Վրաստանի մայրաքաղաք Թբիլիսիում ջրհեղեղի պատճառած վնասը գնահատվում է 40 մլն լարի (մոտ 18 մլն դոլար)։ Այս մասին հայտարարել է Թբիլիսիի քաղաքապետ Դավիթ Նարմանիան «Ռուսթավի 2» հեռուստատեսության եթերում (ֆոտոռեպորտաժ)։ 

«Վերե կիրճի ճանապարհից բացի մնացած հիմնական մասը այսօր ուշ գիշերին բաց կլինի, որպեսզի առավոտյան երթեւեկությունը հնարավոր լինի։ Վնասը կազմում է մոտ 40 մլն լարի, սակայն վնասի չափը պարզվում է, քանի որ վնասված տների մասին տեղեկությունները պարզվում են։ Ինչպես նաեւ կենդանաբանական  այգին եւ փողոցները մաքրելուց հետո մենք կտեսնենք, թե ինչ վիճակում են դրանք»,- հայտարարել է Նարմանիան։

Հիշեցնենք, որ հեղեղումը Թբիլիսիում եղել է կիրակի գիշերը, աննախադեպ տեղատարափից հետո։ Վերջին տվյալներով զոհվել է 13 մարդ, 16 անհետ կորած, ավելի քան 30 հոգի վիրավորվել:  Տարերքը վնասել է մայրաքաղաքի ճանապարհներն ու ենթակառուցվածքները։ Հեղեղվել էր նաեւ գազանանոցը, ինչի հետեւանքով տասնյակ կենդանիներ հայտնվել էին ազատության մեջ։ Թբիլիսիի կենդանաբանական այգու 600 կենդանիներից 300-ն է ողջ մնացել: Մնացածը կամ սատկել են տեղում՝ ջրհեղեղի ժամանակ, կամ փախուստի են դիմել վանդակներից եւ նրանց վնասազերծել են հատուկջոկատայինները:

Թբիլիսիի կենտրոնական շրջաններում շարունակվում է փախած կենդանիների որոնումը, շրջում են ուղղաթիռներ, բնակիչներին կոչ են արել դուրս չգալ փողոց։