Նախկին եւ ներկա մի խումբ պատգամավորներ, շոուբիզնեսի ներկայացուցիչներ այս պահին պատ են կազմում Բաղրամյան պողոտայում, ոստիկանների եւ ցուցարարների միջեւ: (ֆոտոռեպորտաժ)
Ինչպես հայտնում է NEWS.am-ի թղթակիցը, պատնեշ կազմելու համար ժամանել են Խաչատուր Սուքիասյանը, Սասուն Միքայելյանը, Լյուդմիլա Սարգսյանը, Նիկոլ Փաշինյանը, Թեւան Պողոսյանը, Էդմոն Մարուքյանը, Աղվան Վարդանյանը, Արծվիկ Մինասյանը, Ալեքսանդր Արզումանյանը, Խաչատուր Քոքոբելյանը, Հեղինե Բիշարյանը, Տիգրան Ուրիխանյանը, հանրապետական Սամվել Ֆարմանյանը, ԿԳ նախարար Արմեն Աշոտյանը, Տիկնիկային թատրոնի տնօրեն Ռուբեն Բաբայանը, դերասան Հովհաննես Ազոյանը, դերասաններ, մտավորականներ, փաստաբաններ:
«Ազատ դեմոկրատներ» կուսակցության նախագահ Խաչատուր Քոքոբելյանը նշեց, թե իրենք իրենց իրավունք չեն վերապահում միջամտելու նստացույցի նախաձեռնողների մարտավարության մեջ: Նա նշեց, որ իրենք եկել են միայն որեւէ միջադեպ թույլ չտալու համար:
Մինչ այդ ոստիկանների շրջանում շարժ սկսվեց: Փոխոստիկանապետ Հունան Պողոսյանի պնդմամբ, ոստիկանները միայն հերթափոխ են իրականացրել, ոչ ավելին:
Նշենք, որ չորս օր տեւած նստացույցից հետո հունիսի 22-ին ավարտվել էր «Ոչ թալանին» նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկաննեը փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել են ցույցը, ապա բերման ենթարկել ակտիվիստների եւ լրագրողների:
Երեկոյան նստացույցի մասնակիցներն ավելի մեծ բազմությամբ են շարժվել դեպի Բաղրամյան պողոտա:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
