Շախմատի միջազգային ֆեդերացիայի (ՖԻԴԵ) նախագահի աթոռի շնորհիվ Գարրի Կասպարովը ցանկանում էր իր քաղաքական հավակնություններն իրագործել: ՄԳԻՄՈ-ի շրջանավարտների երրորդ միջազգային համաժողովի շրջանակում լրագրողների հետ զրույցում նման կարծիք է հայտնել ՖԻԴԵ-ի նախագահ Կիրսան Իլյումժինովը՝ մեկնաբանելով հայտնի շախմատիստի որակազրկման հետ կապված իրավիճակը: Իլյումժինովի խոսքով, իմանալով, որ Կասպարովը մտադիր է 2014-ին նորվեգական Տրոմսա քաղաքում առաջադրվել ՖԻԴԵ-ի նախագահի պաշտոնում, նա վերջինիս առաջարկել է Շախմատի միջազգային ակադեմիայի նախագահի պաշտոնը, սակայն Կասպարովը հրաժարվել է:
«ՖԻԴԵ-ի նախագահի պաշտոնը ստանալը Կասպարովի քաղաքական որոշումն էր: Դրա շնորհիվ նա ցանկանում էր մասնակցել մեծ քաղաքականությանը եւ հանուն դրա որոշեց կաշառել ձայները: Ինձ համար շատ ցավալի է, որ նա ներքաշված է կոռուպցիոն պատմության մեջ: Ես ու Կասպարովը ընկերներ ենք եւ ես նրան ականավոր շախմատիստ եմ համարում: Կարծում եմ, որպես շախմատի աշխարհի 13-րդ չեմպիոն նա պիտի հանուն շախմատի գործեր, բայց նա քաղաքականություն է մտել», - ասել է Իլյումժինովը:
Էթիկայի հանձնաժողովի ստեղծման եւ հետաքննության անցկացման համար առիթ է ծառայել ամերիկյան «The New York Times» պարբերականի 2014-ի հունվարի հրապարակումը, նշել է ՖԻԴԵ-ի նախագահը:
«Թերթի լրագրողների ձեռքն է ընկել Կասպարովի եւ Լեոնգի միջեւ կնքված մի պայմանագիր, որով Կասպարովը 500 հազար դոլար էր առաջարկում ֆեդերացիայի նախագահի ընտրություններում Սինգապուրի ձայնի համար: Բացի այդ, եթե Լեոնգը կարողանար եւս 10 երկրի ձայն ստանալ, ամեն ձայնի համար 100 հազար դոլար էր առաջարկվում», - մանրամասնել է Իլյումժինովը:
Նրա խոսքով, հանձնաժողովի անդամները մեկ տարուց ավելի զբաղվել են այդ գործի հետաքննությամբ, հարցաքննել են Իրավաբանների, իրեն՝ Կասպարովին եւ Լեոնգին: Արդյունքում հանձնաժողովը Կասպարովին եւ ՖԻԴԵ-ի նախկին գլխավոր քարտուղար Իգնատիուս Լեոնգին մեղավոր է ճանաչել ՖԻԴԵ-ի բարոյական օրենքները խախտելու համար եւ երկու տարով հեռացրել է կազմակերպության հետ կապված որեւէ գործունեությունից:
Անի Աֆյան