Ոստիկանության ՊՊԾ գունդը գրաված «Սասնա ծռեր» խումբը ոչ մի բժշկի պատանդ չի վերցրել, այլ պահանջում է բժշկական հերթափոխի բրիգադ: Այս մասին այսօր՝ հուլիսի 27-ին, լրագրողների հետ հանդիպմանն ասաց «Հիմնադիր խորհրդարանի» անդամ Ալեք Ենիգոմշյանը՝ անդրադառնալով ոստիկանության տարածած հաղորդագրությանը, թե բժիշկների են պատանդ վերցրել:
«Ներսում կա երկու վիրավոր. մեկը, որը նախկինում էր վիրավորվել, մյուսն էլ երեկ էր թեթեւ վիրավորում ստացել: Տղաները տիրապետում են իրավիճակին եւ վճռական են: «Սասնա ծռերը» ունեն երկու գործնական պահանջ: Մեկը վերաբերում է բժշկական ծառայությանը: Ներկայումս ներսում գտնվում է բժիշկ, եւ ոստիկանությունը հայտարարում է, որ «Սասնա ծռերը» պատանդ են վերցրել նրան: Նման բան չկա, տղաները պահանջում են, որ լինի բժշկական բրիգադի հերթափոխ եւ ոչ մի ուժի, պարտադրանքի գործադրմամբ պահելու խնդիր չկա: Թող բրիգադը գա եւ ներսում գտնվողներին փոխարինի: Բժիշկներին պատանդ պահելը հերթական սուտն է, հերյուրանք է: Տղաները միայն ուզում են, որ այնտեղ բժիշկների ներկայությունը լինի տեւական եւ հերթափոխով: Երկրորդ պահանջն այն է, որ տղաները պահանջում են, որ պատգամավորները խիստ պահանջ ներկայացնեն ոստիկաններին, որ գնան, հանդիպեն «Սասնա ծռերի» տղաներին»,- ասաց Ալեք Ենիգոմշյանը:
«Հիմնադիր խորհրդարանի» անդամը հորդորեց պատգամավորներին գնալ եւ պահանջել, որ մտնեն ՊՊԾ գնդի տարածք եւ հանդիպեն խմբի անդամների հետ:
Հարցին, թե ինչ փուլում են այս պահին բանակցությունները, Ալեք Ենիգոմշյանը պատասխանեց. «Բանակցությունները վերջին օրերին չեն եղել: Բանակցությունները, որոնք եղել են, իմիտացիոն բնույթ են կրել, վարչախմբի ներկայացուցիչները իրական բանակցություններ չեն վարել: Սեֆիլյանը հենց առաջին օրվանից իր աջակցությունն էր առաջարկել, ասել էին՝ սկզբում պատանդներին բաց թողեք, հետո կխոսենք մնացածի մասին: Պատանդները ազատ են արձակվել, բայց մնացածի մասին չի խոսվում: Խաբեությամբ եւ ստոր մոտեցումների գործելաձեւը շարունակվում է»: