Կստորագրվի հայ-հնդկական կրթական համագործակցության նոր համաձայնագիր: Այս մասին նշվել է այսօր՝ դեկտեմբերի 5-ին, ՀՀ կրթության եւ գիտության նախարար Լեւոն Մկրտչյանի եւ ՀՀ-ում Հնդկաստանի արտակարգ եւ լիազոր դեսպան Սանգվան Յոգեշվարիի հանդիպման ժամանակ:
ԿԳՆ-ից NEWS.am-ին հայտնում են, որ ողջունելով դեսպանին` նախարար Լեւոն Մկրտչյանը նշել է, որ հայ-հնդկական բարեկամական հարաբերությունները, որոնք դարերի պատմություն ունեն, մեր երկրի համար կարեւորվում են հատկապես` կրթամշակութային ոլորտում: Այդ համատեքստում` Լեւոն Մկրտչյանը կարեւորել է համագործակցության զարգացմանն ու խորացմանն ուղղված գործնական քայլերի իրականացումը:
Հանդիպման ընթացքում հիմնականում զրույցը ծավալվել է «Հայաստանի Հանրապետության կառավարության եւ Հնդկաստանի Հանրապետության կառավարության միջեւ` բարձրագույն եւ հետբուհական մասնագիտական կրթության որակավորումների փոխադարձ ճանաչման մասին» համաձայնագրի նախագծի շուրջ: Համաձայնագրով նախատեսվում է բարձրագույն կրթության համակարգում, ինչպես նաեւ հետազոտական հաստատությունների միջեւ ուղիղ կապերի հաստատում եւ զարգացում, ուսանողների, հետազոտողների փոխանակումներ` միմյանց կրթական եւ գիտական փորձառության փոխճանաչում: Համաձայնագիրը կնպաստի երկու կողմերի միջեւ փորձի փոխանակմանը, կօժանդակի դասընթացների, գիտաժողովների կազմակերպմանը, կխթանի համատեղ նախագծերի մշակմանը ու իրականացմանը:
Շնորհակալություն հայտնելով կրթության ոլորտում առկա համագործակցության առնչությամբ` դեսպան Սանգվան Յոգեշվարին հույս է հայտնել, որ այդ համաձայնագրի ստորագրումը նոր թափ կհաղորդի կրթության ոլորտում երկու երկրների միջեւ համագործակցության ամրապնդմանը եւ զարգացմանը: