Ինձ դժվար չէր դժվարությունները տանել, քանի որ ուշ թե շուտ իմ հնարավորությունը ստանալու էի: Այս մասին, այսօր՝ մարտի 24-ին, Ֆուտբոլի ակադեմիայում կայացած Հայաստանի 2016 թվականի լավագույն ֆուտբոլիստի եւ մարզչի պարգեւատրման արարողությունից հետո լրագրողների հետ զրույցում նշել է Հենրիխ Մխիթարյանը:
Լավագույնը ճանաչվելու մասին
Ուրախ եմ, որ կրկին դարձել եմ Հայաստանի լավագույն ֆուտբոլիստ: Այս մրցանակը հետագայում ինձ ուժ կտա եւ կփորձեմ ամեն բան անել որպեսզի նորից արժանանամ այս մրցանակին:
Երկրպագուների սպասելիքների մասին
Երկրպագուների սպասելիքները միշտ մեծ են: Բոլորն էլ հաղթանակ են սպասում: Նախորդ խաղը տպավորիչ ստացվեց եւ բնական է, որ այս անգամ էլ պետք է խաղանք հաղթանակի համար:
Մարզավիճակի մասին
Փոքր վնասվածք ունեի՝ չնայած պահեստայինների թվում էի: Փառք Աստծու, հիմա ամեն ինչ կարգին է:
Հայաստանում տաղանդավոր երիտասարդների մասին
Շատ չեմ հետեւում Հայաստանի առաջնության խաղերին: Եթե լինեն տաղանդավոր խաղացողներ, շատ ուրախ կլինեմ, որպեսզի փոխարինեն մեր սերնդին:
Մրցակցություն միշտ կա: Կարեւոր չէ, թե քանի անգամ եմ դառնում լավագույն ֆուտբոլիստ: Ես չեմ խաղում Հայաստանի լավագույն ֆուտբոլիստ դառնալու համար, այլ իմ համար, իմ ազգի համար: Ուզում եմ Հայաստանը բարձր պահել աշխարհում, բոլորը իմանան մեր երկրի մասին:
«Մանչեսթեր Յունայթեդի» մասին
Բոլորը պետք է կարողանան անցնել դժվարությունների միջով: Ինձ դժվար չէր դժվարությունները տանել, քանի որ ուշ թե շուտ իմ հնարավորությունը ստանալու էի: Վերջում ստացա արդյունքը: Փորձում եմ օգտակար լինել թիմին:
Ղազախստանի հավաքականի մասին
Բոլոր մրցակիցներն էլ ուժեղ են: Պետք է տեսնենք, թե ինչպես ենք ուսումնասիրել մրցակցին եւ որքանով ենք պատրաստ: Մարզիչն ամեն ինչ կներկայացնի եւ կօգնի մեզ: