Հայոց ցեղասպանության ժխտումը քաղաքական հարց չէ, այն մարդու իրավունքների հարց է: Այս մասին Fox News հեռուստաալիքով Թաքեր Կարլսոնի հաղորդման ժամանակ հայտարարել է «Ժխտման ճարտարապետները» ֆիլմի գործադիր պրոդյուսեր Դին Քեյնը:
Քեյնի խոսքով՝ իրենք որոշ խնդիրներ են ունեցել Գլենդելում ֆիլմի գովազդի ժամանակ: Իրենց ասել են, որ սա «շատ քաղաքական հարց է»:
«Ես ասացի, որ սա բոլորովին էլ քաղաքականության հարց չէ, այլ մարդու իրավունքների: Այդտեղ չկա քաղաքականություն: Միթե Հոլոքոստը քաղաքական հարց է՝ ոչ»,- ասել է Քեյնը:
Նա ընդգծել է, որ խնդիրը նրանումն է, որ դաշնային կառավարությունը չի ընդունել Ցեղասպանությունը:
«Ես կարծում եմ պատճառն այն է, որ մենք Թուրքիայում ավիաբազա ունենք եւ մենք փորձում ենք ոչինչ չփչացնել», - ասել է Քեյնը:
Նա համակարծիք է եղել հաղորդավարի հետ, որ Թուրքիայի կառավարությունը ազդում է ԱՄՆ քաղաքական գործիչների որոշման վրա:
«Մենք փորձում ենք ասել` ճանաչեք Ցեղասպանությունը: Եթե դուք չճանաչեք այն, ապա իմացեք՝ ժխտված ցեղասպանությունը շարունակվող ցեղասպանություն է: Հենց դա է պատճառն այն ամենի ինչ այժմ քրիստոնյաների հետ կատարվում է Իրաքում եւ Սիրիայում », - ասել է պրոդյուսերը:
Իր հերթին, Թաքեր Կարլսոնն ընդգծել է, որ ոչ ոք այսօր չի ասում, որ դա եղել է ոչ միայն հայերի Ցեղասպանություն, այլեւ մուսուլմանական մեծամասնության կողմից քրիստոնյաների փոքրամասնության սպանություն: Եվ դա այն է, ինչ այսօր տեղի է ունենում աշխարհում: