«Ելք» խմբակցությունը հետեւողական է լինելու, որպեսզի անպայման բոլոր եղած ընթացակարգերը գործեն, հանձնաժողով ձեւավորվի եւ քննարկվի Արտաշես Գեղամյանի պահվածքը: Այս մասին, այսօր՝ հոկտեմբերի 5-ին, ԱԺ-ում լրագրողների հետ զրույցում հայտարարել է «Ելք» խմբակցության պատգամավոր Էդմոն Մարուքյանը` մեկնաբանելով Նիկոլ Փաշինյանի եւ Արտաշես Գեղամյանի միջեւ տեղի ունեցած ծեծկռտուքը:
«Պառլամենտը խոսելու վայր է, և հիմա եթե խոսելու վայրում մարդիկ չունեն փաստարկներ խոսելու համար ու դիմում են բռնությանը, բռունցքներին, դա ցիվիլ չէ: Եթե ցիվիլ մարդն իրեն այդպես է պահում, բայց ոչ ցիվիլների՞ց ինչ ակնկալենք: Ամենածայրահեղ ձեւով մենք դատապարտում ենք այս պահվածքը»,-հայտարարեց Մարուքյանը:
Նա նկատեց, որ եթե ՀՀԿ խմբակցությունը չի դատապարտում իր պատգամավորի պահվածքը, դա նշանակում է՝ խրախուսում է «վայրենի, ոչ քաղաքակիրթ, խորհրդարանական վարքուբարքը, անհարիր պահվածքը»։
«Կամ էդ մեծամասնությունը խրախուսո՞ւմ է բռնությունը, չի դատապարտում, կամ ո՞ւմ է ուզում ցույց տա, թե տեսեք, մեր փաստարկները լավը չէին, բայց բռունցքներով կծեծենք: Ռուսաստանի՞ն էին ուզում ցույց տային, իրենց շեֆերի՞ն, որտե՞ղ էին ուզում այդ թեման ծախեին»,- ասաց Մարուքյանը:
Դիտարկմանը, որ Գեղամյանն ասել է, թե չի հարվածել, Է.Մարուքյանը պատասխանեց, որ ինքը Նիկոլ Փաշինյանին է հավատում, ոչ թե Գեղամյանին. «Մենք մանրամասն գիտենք` ինչ է տեղի ունեցել: Գեղամյանը մոտեցել է, ասել է՝ անունս չտաս, Փաշինյանն էլ ասել է, որ սա խորհրդարան է, բոլորի անունն էլ պետք է տալ, եւ Գեղամյանը սկսել է հարվածել: