Շուտով կանցկացվեն Երեւանի հիմնադրման տարեդարձին նվիրված «Էրեբունի-Երեւան» ավանդական միջոցառումները: Թվում է, թե ինչ կապ կարող է լինել այս տոնի եւ Բեռլինի թանգարաններից մեկի միջեւ:
Նախ նշենք, որ Շպրեե գետի կղզու վրա տեղակայված թանգարանն ունի Եվրոպայի ամենամեծ հավաքածուներից մեկը: Այստեղ ներկայացված են Հին աշխարհի էքսպոնատները, խեթերի, ասորիների, բաբելոնցիների եւ Առաջավոր Ասիայի այլ ազգերի արվեստի ստեղծագործությունները:
Ցավոք, հավաքածուի մարգարիտը՝ Պերգամոնի զոհասեղանը (Օլիմպոսի աստվածների եւ հսկաների մենամարտի պատկերով) վերանորոգման պատճառով, փակ է:
Սակայն կան նաեւ այլ էքսպոնատներ, որոնք կհետաքրքրեն այցելուներին, այդ թվում Հայաստանի զբոսաշրջիկներին: Դա Ուրարտուին նվիրված սրահն է:
Տարածքը համեմատաբար մեծ չէ: Այստեղ լուսավորված ինֆորմացիոն ստենդից բացի կան նաեւ Ուրարտուի թագավորների սեպագիր արձանագրությունները:
Մոտավորապես մ․թ․ա․ 810-785-80-ականներին թվագրվող ժայռի բեկորի վրա փորագրված արձանագրությունը գերմաներենից թարգմանաբար պատմում է ուրարտացիների կողմից Լուխիունի քաղաքի գրավման մասին, որը գտնվել է Արարատի հյուսիսային մասում:
Մենուան՝ Իշպուինի թագավորի որդին, ասում է, որ գրավելով Լուխիունին, քաղաքին պարտադրել է տուրք վճարել: Արձանագրությունն ավարտվում է այն վնասելու դեպքում աստվածների սարսափելի պատժի մասին ավանդական խոսքերով: Նշենք, որ ուրարտացիներն այստեղ սահմանապահ ամրոց են կառուցել, որն անվանել են Մենուայի անունով՝ Մենուախինիլի:
Միջնադարում Մենուախինիլիի տեղում հայկական Ցոլակերտ քաղաքն է հիմնադրվել:
Քաղաքն Արեւելյան Հայաստանի որոշ շրջանների հետ Կարսի պայմանագրով անցել է Թուրքիային: