ՀՀ ոստիկանապետի առաջին տեղեկալ, գեներալ-լեյտենանտ Հունան Պողոսյանը թեեւ այսօր Ազգային ժողովում ներկայացնում էր օրենքի նախագիծ, սակայն պնդում էր, որ ՀՀԿ-ական պատգամավոր Արտաշես Գեղամյանի եւ ընդդիմադիր պատգամավոր Նիկոլ Փաշինյանի միջեւ տեղի ունեցած միջադեպի մասին ոչինչ չէր լսել: Հիշեցնենք, որ Արտաշես Գեղամյանն այսօր Աժ միջանցքում հարձակվել եւ բռունցքներով հարվածել էր Նիկոլ Փաշինյանին, քանի որ վերջինիս ելույթը իր սրտով չի եղել: Այս եւ վերջին շրջանում արձանագրված կրակոցների, սպանությունների մասին NEWS.am-ը զրուցել է փոխոստիկանապետ Հունան Պողոսյանի հետ:
Պարոն Պողոսյան, Հանրապետական խմբակցության պատգամավոր Արտաշես Գեղամյանն այսօր Ազգային ժողովի միջանցքում հարձակվել է «Ելք» խմբակցության պատգամավոր Նիկոլ Փաշինյանի վրա եւ բռունցքներով հարվածել: Որպես փոխոստիկանապետ՝ իշխանական պատգամավորի վարքագծին ի՞նչ գնահատական կտաք:
Ճիշտն ասած, բացաձակ տեղյակ չեմ, ԱԺ եմ մտել տասը րոպե առաջ:
Դա տեղի է ունեցել ժամեր առաջ, չե՞ք տեղեկացել:
Գիտեք ինչ, կտեղեկանանք, օրենքով սահմանված կարգով ընթացք կստանա: Իհարկե, չեմ ողջունում ոչ մի նմանատիպ դեպք, բայց դուք անմեղության կանխավարկածն եք խախտում… Չեմ կարծում՝ պարոն Գեղամանը իր տարիների փորձով…. այս պարագայում նման քայլի գնար, իրական փաստերը ունեցեք, նոր մեկնաբանեք:
Ինչո՞վ եք բացատրում վերջին շրջանում կրիմինալի ակտիվացումը, կրակոցների, սպանությունների աճը: Շատերը այն վերագրում են ոստիկանության անգործությանը, ի՞նչ կասեք այս մասին:
Պարապ մարդկանց խոսակցություններ են, ոնց կարելի դա վերագրել ոստիկանության անգործությանը, այդպես են ցանկանում, այդպես են ասում: Ոստիկանությունը թե կանխարգելիչ, թե օպերատիվ հետախուզական միջոցառումների արդյունքում ցույց է տալիս, որ իրոք, իրավիճակը վերահսկելի է: Ոչ մի երկրում ոչ մի հասարակությունում նման դեպքերից ոչ մեկ ապահովագրված չէ:
Նախօրեին դարձյալ սպանություն տեղի ունեցավ Նորագավիթում ….
Հաշված րոպեների ընթացքում բացահայտվեց դեպքը…
Օրերս NEWS.am-ի հետ զրույցում նախկին գլխավոր դատախազ Գեւորգ Կոստանյանը անդրադառնալով քրեական միջավայրի ակտիվացմանն՝ ասաց, որ հանցավորության, վենդետայի հիմքում բացի այլ պատճառներից կա նաեւ անպատժելիություն: Համամի՞տ եք նախկին գլխավոր դատախազի հետ:
Գործընկերոջը մեկնաբանելը անշնորհակալ գործ է, բայց ես իր հետ համաձայն եմ մասամբ: Վենդետան միմիայն անպատժելիության հետեւանք չէ, որովհետեւ ես չեմ ուզում նախաքննության գաղտնիք հրապարակել կամ անմեղության կանխավարկած խախտել, բայց օրինակ Նորագավիթում վերջին դեպքը, որը Դուք հիշատակեցիք, դա էլ կախված էր ինչ-որ նախկին դեպքերի հետ, բայց սա էն պարագայում, որ քաղաքացիները իրենց հետ կատարված դեպքերի մասին անհրաժեշտ ինֆորմացիա չեն տրամադրում: Երկրորդը, երբ ամեն ինչ ակնհայտ է եւ իրոք արժանի համաչափ, իրավաչափ պատիժ քաղաքացին չի ստանում, դա այլ բան է, վերջին տարիներին նման պրակտիկա չկա մեր պետաիրավական, դատական համակարգում:
Նախկին գլխավոր դատախազը, թերեւս հենց նկատի ունենալով ոստիկանությանն՝ ասաց, որ բացահայտման աճի մասին հայտարարություններ են արվում, մինչդեռ կանխարգելիչ գործառույթը եւս շատ կարեւոր է, որը պետք է պատշաճ մակարդակի վրա դնել, նշեց նաեւ, որ մեր տիպի հասարակություններում կան հանցագործություններ, որոնք հեշտ է կանխարգելել: Ի՞նչն է խոչընդոտում ոստիկանությանը կանխարգելիչ ֆունկցիան պատշաճ մակարդակում հասցնել:
Կանխարգելիչ գործառույթը երբեւէ չի եղել ցանկալի մակարդակի վրա, եթե վաղը լինի ամենացանկալի մակարդակին նույնիսկ, միեւնույն է՝ մենք բավարարված չենք զգալու մեզ, դա ստեղծագործական աշխատանք է, որը պահանջում է իրավիճակի խորը վերլուծություն, ես չգիտեմ՝ ով ինչ է ասել, ոստիկանությունը իր գործառույթը պատշաճ է կատարում: Նախկին գլխավոր դատախազի հետ համաձայն եմ մասամբ, կանխարգելիչ աշխատանքները կարեւոր բաղադրիչ են, բայց միայն դա բավարար չէ: Կանխարգելելը քաղաքացու իրավագիտակցության հետ է կապված: Ցանկացած քաղաքակիրթ երկրում տեսեք՝ ինչեր է կատարվում, Լաս Վեգասի վերջին դեպքերը տեսեք, ինչ-որ մեկի մտքով ինչ է անցել, ինչ քայլի է գնացել այն դեպքում, երբ ոչ հոգեպես անհավասարակշիռ վիճակում չի եղել, ոչ էլ ֆինանսական խնդիր է ունեցել: Պահի տակ ստեղծված իրավիճակը չի կարող հիմք հանդիսանալ, որ քննադատեն ու ասեն՝ կանխարգելիչ աշխատանք չի կատարվել: Մարդիկ վիճել են տարիներ առաջ, հիմա մարդը գտնվելով ոգելից խմիչքի ազդեցության տակ՝ որոշում է կայացրել, դա մի բան է, երբ որ քաղաքացին գտնվում է օպերատիվ հետախուզական միջոցառումների ներքո եւ տեսադաշտից դուրս է մնում, դա այլ խնդիր է: Այնպես որ ես իր հետ համաձայն եմ մասամբ, դրա մասին ավելի վաղ էլ ենք խոսել, երբ որ Կոստանյանը գլխավոր դատախազ էր, այն ժամանակ իր կարծիքը մի քիչ այլ էր:
Ավելի բաձր կարծիքի է՞ր…
Կարծում եմ, հիմա էլ պարոն Կոստանյանը ոստիկանության մասին բարձր կարծիքի է:
Պարոն Պողոսյան, քիչ չեն մեղադրանքները, որ ոստիկանոթյունը քրեական աշխարհի հետ սերտաճել է, ինչն էլ հանգեցնում է նման իրավիճակի: Այս մասին ի՞նչ կասեք:
Թույլ, սին, բամբասանքի աստիճանի խոսակցություններ են, դա շահարկողները գալիս, այս կամ այն քրեական հեղինակության համար բարեխոսում են եւ հետո տեսնում են, որ բարեխոսությունը չի անցնում, քրեական հեղինակությունը եթե կատարում է օրենքով սահմանված խախտում, հանցագործություն, անմիջապես պատժվում է, շահարկում են: Օրինակներ չեք գտնի, որ չեն պատժվում: Էդ շահարկողները միջնորդություններով են հանդես գալիս քրեական հեղինակությունների համար:
Դուք շարունակում եք պնդե՞լ, որ օպերատիվ իրավիճակը վերահսկելի է՝ չնայած արդեն առօրյա դարձած կրակոցներին ու արյունալի դեպքերին:
Շարունակում եմ պնդել՝ օպերատիվ իրավիճակը վերահսկելի է: Ոչ մեկը ապահովագրված չէ նման դեպքերից, ես չեմ կարող կանխատեսել՝ վաղը կլինի, թե չէ որեւէ դեպք, ցանկացած դեպքով զբաղվում ենք:
Քրեական խրոնիկան հաշվի առնելով՝ չկա՞ն պաշտոնյաներ, որոնք, ինչպես ասում է ոստիկանապետը՝ պետք է հանվեն համազգեստի միջից:
Շատ լավ է, որ պարոն Գասպարյանի խոսքերը դարձել են թեւավոր խոսքեր, մենք էդ գործընթացը սկսել ենք, ընթացքի մեջ է եւ երբեւէ չի ավարտվել, եթե ավարտվի, ուրեմն իդեալական հասաակություն ու ոստիկանություն ունենք: Հաշվի առեք նաեւ սերնդափոխությունը: Կանխարգելիչ աշխատանքներից խոսողը պետք է հասկանա՝ ինչ սերնդափոխություն է տեղի ունենում: Մի բան է, որ էդ հատվածում աշխատողը ունի 20 տարվա փորձ, մի բան է, որ աշխատողը երիտասարդ է…. Երիտասարդի ավյունն է լավը…
Սերնդափոխության մասին նշեցիք, իսկ Դուք պատրա՞ստ եք Ձեր պաշտոնը զիջել երիտասարդներին, օրինակ ոստիկանապետը օրեր առաջ լրագրողների հետ զրույցում հայտարարեց, որ պատրաստ է զիջել երիտասարդներին, հիմնավորելով, թե արդեն «ծերուկներ ենք»:
Ցանկացած պահի պատրաստ եմ զիջել, չնայած չեմ կարծում, որ այն տարիքում եմ…