ԱՄՆ-ն ուրախ է Հայաստանի գյուղատնտեսությանն աջակցելու համար: Նոյեմբերի 1-ին լրագրողների հետ զրույցում այս մասին ասաց Հայաստանում ԱՄՆ դեսպանատան գործերի ժամանակավոր հավատարմատար Ռաֆիկ Մանսուրը՝ Երեւանում անցկացված Valmont եւ Monsanto ընկերությունների գործունեության շնորհանդեսի շրջանակում:
Նրա խոսքով՝ գյուղատնտեսությունը Հայաստանի տնտեսության համար կարեւորագույն ճյուղերից է, որն ապահովում է ՀՆԱ-ի գրեթե 20 տոկոսը եւ երկրում զբավածության 36,2 տոկոսը: «ԱՄՆ-ն ուրախ է այստեղ ներկայացնել հայկական ընկերությունների փորձը եւ նրանց հետ համագործակցության հնարավորությունները»,- ասաց Մանսուրը: ԱՄՆ-ն վաղուց եւ հաջողությամբ աջակցում է Հայաստանի գյուղատնտեսական նախագծերին: Բավական է հիշել «Հազարամյակի մարտահրավերներ» ծրագիրը, ինչպես նաեւ Գյուղատնտեսության դեպարտամենտի (USDA) նախագծերը, հավելեց նա:
Լրագրողների հետ զրույցում ԱՄՆ Միջազգայի առեւտրային վարչակազմի քարտուղարի՝ Եվրոպայի, Մերձավոր Արեւելքի եւ Աֆրիկայի հարցերով օգնական Մայքլ Լելին նշեց, որ ԱՄՆ-ն Հայաստանում շարունակում է ոլորտային քննարկումները: Առաջին երկուսը վերաբերել են լեռնահանքային արդյունաբերությանը եւ վերականգնվող էներգետիկային: Երրորդն անցկացվում է գյուղատնտեսության հարցերով: Monsanto-ն նոր սերմեր է ներկայացնում, Valmon-ը՝ կաթիլային ոռոգում: Իսկ Հայաստանի համար նոր տեխնոլոգիաները կարեւոր են:
Monsanto-ի ԱՊՀ-ում առեւտրի մենեջեր Ալեքսանդր Զվյագինցեւը լրագրողների հետ զրույցում հավաստիացրեց, որ ընկերությունը հայ գործընկերներին չի առաջարկի աշխատել գենետեկորեն մոդիֆիկացված արտադրանքով: «Երկրներում, որտեղ դրանք արգելված են, մենք դա չենք անում: Օրինակ՝ Ռուսաստանում եւ Ուկրաինայում մենք նման գործունեոթյուն չենք իրականացնում: Մենք արդեն 20 տարի Հայաստանում ներկայացված ենք միջնորդների միջոցով, սերմեր ենք իրացնում եւ տեսակների հացում խորհրդակցություններ անցկացնում գյուղացիների հետ: Մենք մեր գործունեությունը կշարունակենք օրենսդրության շրջանակում»,- եզրափակեց Զվյագինցեւը: