«Գորիս» քրեակատարողական հիմնարկում հոկտեմբերի 31-ին տեղի ունեցած միջադեպի հետ կապված որոշ մանրամասներ են հայտնի դարձել:
NEWS.am-ի տեղեկություններով, «Գորիս» ՔԿՀ-ում ազգային անվտանգության ծառայության և ՔԿՎ ծառայողների կողմից ռեժիմային մասնաշենքում քննչական գործողություններն առնչություն ունեն թմրամիջոցների հայտնաբերման հետ:
Բացի, ՔԿՀ-ում կատարված խուզարկություններին, նույն ժամանակահատվածում խուզարկվել են նաեւ տարբեր քաղաքացիների տներ և թմրանյութերի գործով մարդիկ են ձերբակալվել: Մասնավորապես, խուզարկվել են նաև Սյունիքի նախկին մարզպետ Սուրիկ Խաչատրյանի երբորորդիների բնակարանները: Իրավապահները կապարակնքել են Սուրիկ Խաչատրյանի եղբայր Սեյրան Խաչատրյանի որդու՝ Էրիկի Mercedes S class 500 մակնիշի ավտոմեքենան:
«Գորիս» ՔԿՀ-ում հոկտեմբերի 31-ին գրանցված արտակարգ միջադեպի պատճառների մասին Ոստիկանության Սյունիքի մարզի Գորիսի բաժնի պետ Կարեն Թադևոսյանը հրաժարվեց մեկնաբանություն տալ՝ ընդգծելով , այս պահին որևէ ավել բան չի կարող նշել՝ ելենելով նախնական քննության գաղտնիությունից:
Ավելի վաղ NEWS.am-ը հայտնել էր, որ ըստ Shamshyan.com-ի, Գորիսի բանտում Հայաստանի քննչական կոմիտեի եւ քրեակատարողական վարչության աշխատակիցների կողմից ռեժիմային մասնաշենքում քննչական եւ դատավարական գործողություններ կատարելու ժամանակ մասնաշենքի 1-ին եւ 2-րդ հարկերի խցերում պահվող կալանավորված անձանց եւ դատապարտյալների միջեւ առաջացել են անհարկի դժգոհություններ։ Այն վերածվել է խցերի դռներին եւ կերակրադռնակներին հարվածելուն, խցերից հայհոյանքներ եւ վիրավորական արտահայտություններ հնչեցնելուն։ Մասնավորապես՝ կալանավորներն այրել են անկողնային պարագաները և դրանք խցերից դուրս նետել, հարվածել դռներին, կոտրել կերակրադռնակները, վնասել են որոշ խցերի փականները:
«Ժողովուրդ» թերթն իր հերթին հայտնել էր, որ իր տեղեկություններով, այդ ստուգումներից հետո անհետացել է «Գորիս» ՔԿՀ-ի «զոն նայող» Կարոն:
Այս ամենի առնչությամբ ՀՀ ԱՆ ՔԿՎ հանրային կապերի բաժինը հայտնել էր, որ նյութեր են նախապատրաստվում «Գորիս» քրեակատարողական հիմնարկում որոշ դատապարտյալների եւ կալանավորված անձանց կողմից ոչ իրավաչափ վարքագիծ դրսեւորելու կապակցությամբ:
Հիշեցնենք, որ կալանավորների կողմից ՔԿՀ-ում անկարգություններ հրահրվելու մի փորձ էր գրանցվել էր 2016 թվականին՝ «Նուբարաշեն»-ում, երբ ՀՀ հատուկ քննչական ծառայության և ՀՀ ոստիկանության կազմակերպված հանցավորության դեմ պայքարի գլխավոր վարչության աշխատակիցները փորձել էին խուզարկություն կատարել քրեական հեղինակություն համարվող անձանցից մեկի խցում։