ՀՀ կառավարության այսօրվա՝ նոյեմբերի 30-ի նիստում, ՀՀ էներգետիկ ենթակառուցվածքների եւ բնական պաշարների նախարար Աշոտ Մանուկյանը ներկայացրել է Հայաստանի եւ Ռուսաստանի կառավարությունների միջեւ բնական գազի առաքման գներին վերաբերող նախագիծը, որը վերնագրված է. «Հայաստանի Հանրապետության կառավարության եւ Ռուսաստանի Դաշնության կառավարության միջեւ Հայաստանի Հանրապետություն բնական գազի առաքման ժամանակ գների ձեւավորման կարգի վերաբերյալ 2013 թվականի դեկտեմբերի 2-ի համաձայնագրում փոփոխություններ կատարելու մասին» արձանագրության կնքման առաջարկությանը համաձայնություն տալու մասին»:
Նախարարը նշեց, որ մոտ մեկ ամիս առաջ ՌԴ ու ՀՀ վարչապետների հանդիպման ժամանակ ձեռք է բերվել համաձայնություն, որով սահմանվել է, որ այս համաձայնագիրն ամրագրվում է այս փոփոխությամբ: «Մինչեւ 2018 թվականի ավարտն այս փոփոխությամբ ՀՀ ներկրվող ռուսական բնական գազի գինը մնում է անփոփոխ»,-ասաց նա՝ հավելելով, որ գազի գինը 2018-ին եւս կլինի 1000 խ/մ 150 դոլար:
Վարչապետ Կարեն Կարապետյանը հիշեցրեց, որ նախորդ տարի մի շարք սպառողների, համայնքների համար տրվել էր դիֆերենցված մոտեցում: «Հաջորդ տարի ինչ-որ քայլեր պիտի կատարվեն, որ դա նույնը մնա: Մեր կառավարությունն այստեղ ունի՞ անելիք»,–հարցրեց նա, ինչին ՀԾԿՀ նախագահ Ռոբերտ Նազարյանը բացասական պատասխան տվեց:
Վարչապետը ներկայացրեց արտոնություններին ենթակա խմբերը` վերամշակող ձեռնարկություններ, որոնց թվում են ջերմոցները, սոցիալապես անապահովներ, սահմանամերձ համայնքներ: