Միայն պարտադիր զինվորական ծառայության մեջ գտնվող անձանց գույքահարկից ազատելու տրամաբանությունն այն է, որ պարտադիր զինվորական ծառայության ընթացքում անձն, իր կամքից անկախ, զրկվում է գույքն օգտագործելու կամ դրանից օգտվելու հնարավորությունից, այնպես էլ առհասարակ եկամուտներ ստանալու հնարավորությունից: Այս մասին այսօր՝ փետրվարի 8-ին, կառավարության նիստից հետո լրագրողների հետ զրույցում ասել է ՀՀ ՀՀ ֆինանսների նախարար Վարդան Արամյանը՝ անդրադառնալով ԱԺ «Ելք» խմբակցության պատգամավորների ներկայացրած պայմանագրային զինծառայողներին գույքահարկից ազատելու վերաբերյալ նախագծին:
Ըստ նրա, «Գույքահարկի մասին» գործող օրենքով՝ ծառայության ողջ ընթացքում գույքահարկից ազատվում են Հայաստանի զինված ուժերում կամ միջազգային պայմանագրերով դաշնակից երկրների զինված ուժերում պարտադիր ժամկետային ծառայության մեջ գտնվող անձինք:
«Այս տարբերակով մենք ծանրաբեռնում ենք տեղական ինքնակառավարման մարմիններին, որովհետեւ գույքահարկը ՏԻՄ-երի համար եկամուտի էական աղբյուր է: Մենք ունենք ավելի նպատակային գործիք, որով խթանում ենք նորեկներին դեպի Հայաստանի Հանրապետության զինված ուժեր»,-ասաց նախարարը:
Նա նշեց, որ կառավարությունը գույքահարկի արտոնություն տալիս է պարտադիր զինվորական ծառայողներին, ըստ որի՝ պարտադրանքի սկզբունքի ներքո տվյալ անձը զրկվում է իր գույքը տիրապետելուց եւ օգտագործելուց: Բոլոր այն դեպքերում, եթե զինծառայողը կունենա արտադրական եւ հասարակական նշանակության գույք եւ դրանից կստանա եկամուտ, տրամաբանական է, որ եկամուտից նա որպես գույքահարկ կվճարի ՏԻՄ-ին. «Խթանում ենք որակյալ սպայական անձնակազմի մուտքը դեպի ՀՀ զինված ուժեր: Դրա համար գույքահարկի արտոնություն է տրվում բոլոր այն անձանց, որոնք պարտադիր զինվորական ծառայությունից հետո բարձրագույն ռազմական ուսումնական հաստատությունում կուսուցանվեն, կունենան բարձրագույն կրթություն»: