Սա Ադրբեջանի նախագահի հերթական անգրագետ, հիմար, անիմաստ ու ծիծաղելի հայտարարությունն է: Այս մասին NEWS.am-ի թղթակցի հետ զրույցում ասաց Հայաստանի Հանրապետության Ազգային Ժողովի փոխխոսնակը, Հայաստանի իշխող Հանրապետական կուսակցության մամուլի քարտուղար Էդուարդ Շարմազանովը՝ մեկնաբանելով Ադրբեջանի նախագահի հայտարարությունն այն մասին, որ «Երեւանը մեր պատմական հողն է, եւ մենք՝ ադրբեջանցիներս, պետք է վերադառնանք այդ հողեր»: ԱԺ փոխխոսնակը վերոնշյալ հայտարարությանն ի պատասխան մեջբերեց Vacua vasa plurimum sontant լատիներեն ասացվածքը (դատարկ կաթսան ավելի բարձր է զնգում):
«21-րդ դարում անընդունելի է, երբ մի երկրի նախագահը հարեւան երկրի հանդեպ տարածքային պահանջներ է ներկայացնում: Իլհամ Ալիեւի նման բանավոր հարձակումները նացիստական Գերմանիայի հայր Ադոլֆ Հիտլերին են հիշեցնում: Ի դեմս Ալիեւի՝ մենք գործ ունենք 21-րդ դարի Հիտլերի հետ: Առնվազն ծիծաղելի է, երբ մի երկրի նախագահը, որի 100 տարին դեռ չի լրացել, պատմական հողերի մասին է խոսում: Իհարկե, իմաստ չունի Ալիեւին որեւէ բան խորհուրդ տալ, սակայն, այնուամենայնիվ, թող կարդա հին պատմաբաններին, օրինակ՝ Ստաբոնին՝ հայերի եւ Հայաստանի հնագույն ակունքների մասին գիտելիքներ ձեռքբերելու համար»,- ասաց Շարմազանովը՝ նշելով, որ եթե ադրբեջանցիների գլխին փչել է վայելել պատմական հողերը, ապա Ալիեւն իր քաղաքացիների հետ միասին վստահ կարող է գնալ Կենտրոնական Ասիա՝ քոչվորների իրենց պատմական հայրենիք:
Ինչ վերաբերում է Ալիեւի՝ Երեւանը գրավելու նախընտրական ձգտմանը, ապա Շարմազանովը հիշեցրեց, որ Իլհամ Ալիեւը այս առումով միակ երազող չէ: Նրա նախորդներից մեկը՝ Աբուլֆազ Էլչիբեյը, իր երկրի քաղաքացիներին նույնպես նման հույսեր էր ներշնչում՝ ամեն անգամ հայտարարելով, որ մտադիր է թեյ խմել Ստեփանակերտում. «Այժմ մենք տեսնում ենք, թե ով որտեղ է գտնվում եւ ինչ է խմում»:
Շարմազանովը ոչ միայն ԵԱՀԿ Մինսկի խմբի համանախագահող երկրների ղեկավարներին, այլեւ ամբողջ միջազգային հանրությանը կոչ արեց ուշադրություն դարձնել Ալիեւի հայտարարությանը եւ համապատասխան եզրահանգումներ անել: