Վոլտերման «խելացի» դրամապանակի հեղինակները նախատեսում էին դեռ 2017-ի դեկտեմբերին ավարտել արտադրությունը եւ սկսել «բեքերներին» նրանց պատվիրած դրամապանակները ուղարկել: Մի շարք տեխնիկական խնդիրների պատճառով արտադրության գործընթացը հետաձգվեց, բայց արդեն մարտին կամ ապրիլին բոլոր մարդիկ, ովքեր աջակցել են Volterman նախագծին, կարող են ստանալ իրենց դրամապանակները: Այս մասին NEWS.am-ի թղթակցի հետ զրույցում ասել է Global AM հասարակական կազմակերպության նախագահ Գեւորգ Պողոսյանը, ով զբաղվել է այս նախագծի առաջխաղացմամբ:
Նրա խոսքով, փորձը ցույց է տալիս, որ հաջողված ծրագրերի միայն 60 տոկոսը, որոնք ֆինանսավորվել են քրաուդֆանդինգի միջոցով, ինչ-որ մի օր արտադրում եւ առաքում են իրենց ապրանքները:
Եվ միայն նրանցից 10 տոկոսն այդ անում է խոստացված ժամկետներում, ուստի նորմալ է, որ Volterman-ը մի փոքր ուշացնում է:
Գեւորգ Պողոսյանի խոսքով՝ Volterman-ի թիմը արտադրության մեծ փորձ չունի, բայց օր ու գիշեր աշխատում է եւ պարբերաբար նախագծի էջում գրում թե ինչպես է աշխատանքն ընթանում, եւ ինչ է կատարվել վերջին շաբաթների ընթացքում:
Հիշեցնենք, որ բազմաֆունկցիոնալ դրամապանակի ստեղծման համար, որը հնարավոր չէ կորցնել եւ որը նաեւ WiFi ռոուտեր է ծառայելու եւ լիցքավորող սարք, պահանջվել է 45 հազար դոլար:
Սակայն ընդամենը մեկ ամսում Volterman-ը Indiegogo քրաուդֆանդինգի հարթակում ավելի քան մեկ մլն դոլար հավաքեց:
Կես տարվա ընթացքում նախագիծը հավաքել է արդեն 1.9 մլն: Հետաքրքիրն այն է, որ ներդրումների միայն 3.7 տոկոսն է կատարվել Հայաստանից, մնացածը՝ այլ երկրներից, այդ թվում Ադրբեջանից:
«Խելացի» դրամապանակի որոշ բաղադրիչները արտադրվում են Չինաստանում՝ հայ մասնագետների հսկողության ներքո:
Իսկ դրամապանակն արտադրվում է Հայաստանում եւ դրա վրա աշխատող թիմը բաղկացած է միայն հայերից:
Հենց այդ պատճառով Volterman-ը միջազգային շուկա դուրս կգա Made in Armenia մակնշմամբ, ընդգծել է Գեւորգ Պողոսյանը: