ՄԱԿ գլխավոր քարտուղար Անտոնիու Գուտերեշը կարծում է, որ միջազգային հանրությունը լուրջ խոչընդոտներ պետք է հաղթահարի կանանց խտրականության եւ շահագործման դեմ պայքարում: Մարտի 8-ի առիթով իր ուղերձում նա հայտարարել է, որ գենդերային հավասարությանը հասնելը, ինչպես նաեւ կանանց իրավունքների եւ հնարավորությունների ընդլայնումը «մեր ժամանակների անավարտ խնդիրներից են եւ այսօրվա աշխարհում մարդու իրավունքների ոլորտի մեծագույն հիմնահարցը»,- փոխանցում է ՏԱՍՍ-ը:
Նրա խոսքով՝ «կանանց իրավունքների պաշտպանության պատմության մեջ շրջադարձային պահ» է սկսվել, մեր ժամանակներում պատմականորեն ձեւավորված անհավասարության խնդրին, որը նպաստում է ճնշմանն ու խտրականությանը, «ինչպես երբեք, մեծ ուշադրություն է հատկացվում»: «Սակայն եթե մենք ձգտում ենք ուժերի պատմականորեն ձեւավորված անհավասարակշռության վերացմանը, որն ընկած է շահագործման եւ խտրականության հիմքում, պետք է լուրջ խոչընդոտներ հաղթահարենք»,- հայտարարել է համաշխարհային կազմակերպության ղեկավարը:
Նա տվյալներ է ներկայացրել, որոնց համաձայն՝ ընտանեկան սեռական բռնության հետեւանքով իրավական պաշտպանությունից զրկված է աշխարհում ավելի քան մեկ միլիարդ կին, իսկ տղամարդկանց եւ կանանց աշխատավարձի միջեւ խզումը աշխարհում հասնում է մինչեւ 40 տոկոսի: «Ազգային խորհրդարաններում կանանց բաժինը կազմում է միջինը քառորդ մասից քիչ, իսկ տնօրենների խորհուրդներում՝ դրանից էլ քիչ,- նշել է Գուտերեշը: Այնտեղ, որտեղ օրենքներ կան, դրանց հաճախ չեն հետեւում, իսկ իրավական պաշտպանության դիմած կանանց չեն վստահում եւ լուրջ չեն ընդունում»:
ՄԱԿ գլխավոր քարտուղարը ուշադրություն է դարձրել սեռական ոտնձգությունների եւ նվաստացումների տարածման չափերին, որոնք տեղի են ունենում «աշխատավայրում, հասարակական վայրերում եւ մասնավոր տներում այն երկրներում, որոնք հպարտանում են գենդերային հավասարության ոլորտում իրենց ձեռքբերումներով»: Նա ընդունել է, որ այս խնդիրը չի շրջանցել նաեւ համաշխարհային կազմակերպությանը, որը կոչված է «ամբողջ աշխարհին օրինակ ծառայելուն»:
Գուտերեշը հիշեցրել է, որ կանանց իրավունքների եւ հնարավորությունների ընդլայնումը մտնում է մինչեւ 2030 թվականը Կայուն զարգացման նպատակների ցանկի մեջ, որը հաստատվել է 2015 թվականին ՄԱԿ կենտրոնակայանում տեղի ունեցած գագաթնաժողովի ժամանակ: