ՀՀ էներգետիկ ենթակառուցվածքների եւ բնական պաշարների նախարար, հայ-թուրքմենական տնտեսական համագործակցության միջկառավարական հանձնաժողովի համանախագահ Աշոտ Մանուկյանի գլխավորած պատվիրակությունը մարտի 20-21-ն աշխատանքային այցով Թուրքմենստանի մայրաքաղաք Աշգաբադում էր:
Նախարարությունից NEWS.am-ին հայտնում են, որ ՀՀ էներգետիկ ենթակառուցվածքների եւ բնական պաշարների նախարար Աշոտ Մանուկյանը եւ Թուրքմենստանի պետական նախարար Միրատ Արչաեւը հանձնաժողովի անդամների հետ քննարկել են անցյալ տարի Երեւանում կայացած հայ-թուրքմենական տնտեսական համագործակցության միջկառավարական հանձնաժողովի 8-րդ նիստի արդյունքում ձեռք բերված պայմանավորվածությունների կատարման ընթացքը եւ առաջիկա անելիքները:
Կողմերը գոհունակությամբ ընդգծել են Աշգաբադ-Երեւան ուղիղ ավիաչվերթի բացման եւ կանոնավոր չվերթերի իրականացման արդյունքում զբոսաշրջության խթանման իրական հնարավորությունները եւ կարեւորել չվերթերի ավելացումը:
Անդրադարձ է եղել նաեւ երկու երկրների միջեւ ապրանքաշրջանառության ծավալների ընդլայնման, արտահանման խրախուսման, ուսանողների եւ մարզիկների փոխանակման ծրագրերին:
Հանդիպման ընթացքում քննարկվել են բնական գազի եւ էլեկտրաէներգիայի առաքման ու փոխանակման եւ այդ համատեսքտում Հայաստան-Իրան-Թուրքմենստան եռակողմ համագործակցության հնարավորությունները:
Երկու երկրների նախարարները քննարկել են նաեւ հայ-թուրքմենական տնտեսական համագործակցության միջկառավարական հանձնաժողովի հաջորդ նիստի օրակարգն ու անցկացման հնարավոր ժամկետները, որը տեղի կունենա 2018թ.-ին Աշգաբադում: