Այս պահին Ֆրանսիայի հրապարակում եւ Բաղրամյան պողոտայում իրավիճակը հանդարտ է։

NEWS.am-ի թղթակիցը հայտնում է, որ այս պահի դրությամբ, նստացույցի մասնակիցները երեք մասի են բաժանվել։ Մի մասը Ֆրանսիայի հրապարակում է, որտեղ զրուցում են, ակտիվորեն քննարկում օրվա կատարվածն ու վաղվա անելիքները, երաժշտություն լսում։

Ցուցարարների մի խումբ գտնվում է Բաղրամյան պողոտայում՝ ոստիկանների քածաշ փշալարերի մոտ։ Մի խումբ էլ Երեւանի փողոցներն է փորձում փակել՝ նստարաններով։

Լարվածություն չկա նաեւ Բաղրամյան պողոտայում կանգնած ոստիկանների շրջանում։ Նրանք էլ մահակներով եւ վահաններով զինված, կանգնած են։

Նշենք, որ պատգամավոր Նիկոլ Փաշինյանն ավելի վաղ հրապարակել է վաղվա գործողությունների պլանը՝ բոլոր ուղղություններով շրջափակել ԱԺ շենքը եւ խափանել հատուկ նիստը։

Ավելի վաղ NEWS.am-ը հայտնել որ, որ Բաղրամյան պողոտայում բախում տեղի ունեցավ ցուցարարների եւ ոստիկանների միջեւ: Նիկոլ Փաշինյանը անցավ փշալարերի վրայով, նրան հետեւեցին այլ ցուցարարներ: Ոստիկանությունը հատուկ միջոցներ, մասնավորապես, լուսաձայնային նռնակներ կիրառեց ցուցարարների նկատմամբ: Բախումների հետեւանքով վիրավորվել է 46 անձ, այդ թվում ինքը՝ Նիկոլ Փաշինյանը: Վիրավորներից վեցը ոստիկաններ են։