«Իմ քայլը» նախաձեռնության ղեկավար, «Քաղաքացիական պայմանագիր» կուսակցության առաջնորդ Նիկոլ Փաշինյանն ու իր աջակիցների հետ միասին լքեցին «Փեթակ» տոնավաճառի տարածքը եւ շարժվեցին դեպի Արշակունյաց պողոտա (ֆոտոռեպորտաժ):

Ոստիկանները շղթա կազմած փակել են «Երեւան Մոլ»-ի մուտքը, սակայն ցուցարարները չփորձեցին մտնել այնտեղ: Ցուցարարները «Հայրենիք» կինոթատրոնից թեքվեցին դեպի Գարեգին Նժդեհի փողոց եւ հասան Նժդեհի անվան հրապարակ:

Փողոցով երթեւեկող մեքենաների վարորդները ազդանշաններով համերաշխություն են հայտնում բողոքի ակցիայի մասնակիցներին:

Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցության առաջնորդ Նիկոլ Փաշինյանն իր աջակիցների հետ միասին ապրիլի 13-ից բողոքի ակցիաներ է իրականացնում Երեւանի փողոցներում՝ արգելափակելով փողոցներն ու հրապարակները: Նրանք բողոքում են Սերժ Սարգսյանի վարչապետ դառնալու դեմ: Բողոքի ակցիաների ընթացքում բախումներից տուժել է 46 մարդ, այդ թվում Նիկոլ Փաշինյանը: Մի քանի տասնյակ մարդիկ բերման են ենթարկվել, այդ թվում անչափահասներ:

Կա հարուցված քրեական գործ Հանրային ռադիո մուտք գործելու եւ Մաշտոց-Թումանյան խաչմերուկում միջադեպի փաստերով՝  ՀՀ քրեական օրենսգրքի 225-րդ հոդվածի հատկանիշներով:

Նշենք, որ ապրիլի 17-ին ԱԺ հատուկ նիստում Սերժ Սարգսյանը ՀՀ վարչապետ է ընտրվել 77 կողմ, 18 դեմ ձայներով:

• Փաշինյանն իր կողմակիցների հետ մտավ «Սուրմալու» տոնավաճառ. «Փեթակի» մուտքը ոստիկանները փակեցին
• Կառավարության մասնաշենքի մոտ իրավիճակը լարվեց. ոստիկանները բերման ենթարկեցին ցուցարարներից մի քանիսին
• Իրավիճակը Հանրապետության հրապարակում. Ոստիկանները շղթա կազմեցին (վիդեո)