Ցուցարարների երկու մեծ խմբերը հատվեցին Սայաթ-Նովա պողոտայում: Երթերից մեկը սկիզբ էր առել ԵՊՀ-ից եւ Աբովյան փողոցից մտել էր Սայաթ-Նովա պողոտա, իսկ մյուս խումբը Խանջյան փողոցից էր մտել Սայաթ-Նովա:

Նրանք ծափողջյուններով ողջունեցին իրար եւ շարունակեցին ճանապարհը:

Աբովյան փողոցից եկող ցուցարարներին ոստիկանները ասացին, որ ազատեն ճանապարհը եւ բացեն երթեւեկությունը, սակայն ցուցարարների թիվը մեծ էր եւ նրանք մնացին փողոցում: Ցուցարարները վանկարկում են՝ «միացեք», «ոստիկանը մերն ա», «դասադուլ»:

Նշենք, որ այս պահին բողոքի մեծ ու փոքր ակցիաներ են ընթանում քաղաքի տարբեր հատվածներում: Մի խումբ ցուցարարներ փակել էին Կորյուն-Տերյան փողոցների խաչմերուկը: Բժշկական համալսարանի ուսանողներն էլ բողոքի ակցիա են իրականացրել Աբովյան-Հերացի հատվածում, որտեղ նրանց դեմ ոստիկանները ուժ են կիրառել եւ մի քանիսին բերման ենթարկել:

Հիշեցնենք, որ այսօր Սերժ Սարգսյանի վարչապետության դեմ ընթացող զանգվածային բողոքի ցույցերի 11-րդ օրն է: երեկ՝ ապրիլի 22-ին, վարչապետ Սերժ Սագսյանի եւ «Իմ քայլը» նախաձեռնության ու «Քաղաքացիական պայմանագիր» կուսակցության առաջնորդ Նիկոլ Փաշինյանի հանդիպումից մեկ ժամ անց ոստիկանությունը ուժ կիրառեց Արցախի փողոցում հավաքված ցուցարարների նկատմամբ, բերման ենթարկեց տասնյակ մարդկանց, այդ թվում՝ ԱԺ պատգամավորներ Նիկոլ Փաշինյանին, Արարատ Միրզոյանին եւ Սասուն Միքայելյանին։ Ավելի ուշ նրանց երեքին ձերբակալել են: Նիկոլ Փաշինյանի գտնվելու վայրն այս պահին անհայտ է:

Նշենք, որ գիշերը ժամը 00.00-ի դրությամբ բերման ենթարկվածների թիվը հասել է 315-ի:

• Ցուցարարները փակել են Կորյուն-Տերյան խաչմերուկը (ուղիղ)
• Քաղաքացիական հագուստով անձինք ծեծել են Հանրային ռադիոյի պրոդյուսեր Վրույր Թադեւոսյանին (վիդեո)
• Լիահույս եմ, որ իմ խնդրանքն ինչ-որ բան կարժենա իմ գործընկերոջ համար. Արա Բաբլոյան (Ֆոտո)