Beeline-ը ստարտափ ինկուբատոր է բացել Երեւանում: Բացման հանդիսավոր արարողությունը տեղի է ունեցել մայիսի 17-ին Հայաստանի մայրաքաղաքի Հյուսիսային պողոտայում գտնվող Beeline-ի գրասենյակում, որտեղ եւ ինկուբատորը կգործի (ֆոտոռեպորտաժ):
Beeline Startup Incubator-ի հիմնական նպատակն է օգնել հայաստանյան ստարտափներին անել իրենց առաջին քայլերը շուկայում: Մասնավորապես, նրանց համար գրասենյակային տարածքներ կտրամադրվեն, ինչպես նաեւ ձեռնարկատիրության, կառավարման, մարկետինգի, PR-ի, ֆինանսական եւ իրավական հարցերի վերաբերյալ վերապատրաստման դասընթացներ եւ վարպետության դասեր կանցկացվեն:
Ինչպես շնորհանդեսի ժամանակ նշեց Հայաստանում Beeline-ի գլխավոր տնօրեն Անդրեյ Պյատախինը, ընկերությունը շահագրգռված է Հայաստանում ստարտափների համար բարենպաստ էկոհամակարգի ստեղծմամբ եւ դրա համար ամենաարդյունավետ գործիքը համարում է իր սեփական ստարտափ ինկուբատորի ստեղծումը, որի անդամներին կցուցաբերվի ցանկացած տեսակի աջակցություն:
«Beeline-ը բիզնեսի սոցիալական պատասխանատվության հետ կապված մեծ թվով ակցիաներով է զբաղվում, սակայն այս տարի ընկերությունը որոշել է կենտրոնանալ այն բանի վրա, թե ինչ է անհրաժեշտ մեր երկրին, իսկ երկրին պետք է այն, ինչը մարդկանց ապագան ավելի լավը կդարձնի: Վստահ եմ, որ ամենակարեւորը կայուն կերպով զարգացող էկոհամակարգի ստեղծումն է, որը օգնում է ստարտափներին, օգնում է երիտասարդ տաղանդավոր մարդկանց իրականացնել իրենց մտքերը»,- ասաց գլխավոր տնօրենը:
Նրա խոսքով՝ Beeline Startup Incubator-ը ընկերության համար բիզնեսի նախագիծ չի հանդիսանում, եւ Beeline-ը չի ակնկալում դրանից դիվիդենտներ ստանալ:
«Վստահ եմ, որ հենց այստեղից կթռչեն համաշխարհային մակարդակի որեւէ գաղափարներ»,- ասաց Պյատախինը:
Beeline Startup Incubator-ի ղեկավար Գեւորգ Պողոսյանը, իր հերթին, պատմեց, որ այսօրվանից օրվանից Beeline Startup Incubator-ում կսկսի աշխատել 10 ստարտափ, որոնց ընկերությունն ընտրել է բաց մրցույթի շրջանակներում: Յուրաքանչյուր ստարտափի հնարավորություն կընձեռնվի 4 ամսվա ընթացքում օգտվել ինկուբատորի ծառայություններից եւ փորձագետների խորհուրդատվությունից:
«Այսօրվանից սկսվում է Beeline Startup Incubator-ի առաջին ցիկլը, որին ավելի քան 20 փորձագետ է մասնակցում, առաջին հերթին՝ Veon-ի թոփ մենեջմենթը: Նախագծում մասնակցում են թվային արտադրանք արտադրող եւ առանց Հայաստանից դուրս գալու միջազգային շուկաներ մուտք գործելու ներուժ ունեցող ստարտափները»,- ասաց Գեւորգ Պողոսյանը: