Փաստաբաններ Երվանդ Վարոսյանն ու Գեւորգ Գյոզալյանն ահազանգում են, որ Սահմանադրական դատարանի դատավորի պաշտոնում Վահե Գրիգորյանի թեկնածության երաշխավորությունը ստորագրած փաստաբանների նկատմամբ ճնշումներ են իրականացվում: Այս մասին տեղեկացնում է «Իրավունքի Եվրոպա միավորում» իրավապաշտպան հասարակական կազմակերպությունը:
Կազմակերպության հայտարարությունում, մասնավորապես, նշվում է. «ՀՀ Սահմանադրական դատարանի դատավորի թեկնածուի ընտրության առաջարկություն ներկայացրած փաստաբանների նկատմամբ կիրառված ճնշումների մասին Սահմանադրական դատարանի դատավորի թեկնածուի ընտրության ընթացակարգի հավասարության, արդարության և թափանցիկության հարցը օրերս բարձրացվել էր ավելի քան 30 հասարակական կազմակերպությունների և 100 ավել փաստաբանների կողմից, ինչին ի պատասխան՝ Հանրապետության նախագահ Արմեն Սարգսյանը մայիսի 17-ին հայտարարեց, որ պատրաստ է լսել Սահմանադրական դատարանի դատավորի թեկնածուի ընտրության հարցում իրավաբանական համայնքի առաջարկությունները:
Նախագահի վերոհիշյալ հայտարարությունից օրեր անց՝ մայիսի 20-ին ավելի քան 200 փաստաբաններ հանդես եկան Սահմանադրական դատարանի դատավորի թեկնածուի առաջարկությամբ և երաշխավորեցին փաստաբան Վահե Գրիգորյանին ՍԴ դատավորի պաշտոնում:
Մայիսի 21-ին փաստաբաններ Երվանդ Վարոսյանը և Գևորգ Գյոզալյանը ահազանգել են, որ Վահե Գրիգորյանի թեկնածության երաշխավորությունը ստորագրած փաստաբանների նկատմամբ իրականացվում են ճնշումներ: Մտահոգություններն ավելի հիմնավոր դարձան, երբ փաստաբան Սեդա Սողոմոնյանը հետ կանչեց իր ստորագրությունը երաշխավորությունից: «Իրավունքի Եվրոպա միավորում» իրավապաշտպան հասարակական կազմակերպությանը, որը դիտորդական առաքելություն է իրականացնում Հայաստանի Հանրապետության Սահմանադրական դատարանի դատավորի ընտրության գործընթացի նկատմամբ, խստագույնս մտահոգված է կատարվածով և այն դիտարկում է որպես ստվերային ճնշում Սահմանադրական դատարանի դատավորի թեկնածուի ընտրության գործընթացի, ինչպես նաև փաստաբանների ազատ կամքի նկատմամբ: Կատարվածը արատավորում է ոչ միայն ճնշումները նախաձեռնողներին, այլև փաստաբանների ազատության ինստիտուտը:
«Իրավունքի Եվրոպա միավորում» իրավապաշտպան հասարակական կազմակերպությունը կոչ է անում դադարեցնել բոլոր տիպի ճնշումները փաստաբանների նկատմամբ: Միևնույն ժամանակ, հավատացնում է, որ աչալրջորեն հետևելու է գործընթացի բոլոր զարգացումներին, իսկ նման ճնշումների մասին բոլոր փաստերին արտացոլելու է կազմակերպության զեկույցներում, որոնք հասանելի են լինելու ինչպես հայ հանրությանը, այնպես էլ՝ կազմակերպության միջազգային գործընկերներին»: