Հայաստանում արդարադատության վերականգնմանն ու հաստատմանն ուղղված գործընթացները ճիշտ են, եւ տվյալ գործընթացը պետք է շարունակվի նույն տրամաբանությամբ՝ բոլոր մեղավորներին պատժելու վճռականությամբ: Այս մասին օգոստոսի 20-ին լրագրողների հետ հանդիպման ժամանակ ասաց փաստաբան Նորայր Նորիկյանը՝ մեկնաբանելով ՀՀ վարչապետ Նիկոլ Փաշինյանի ելույթը օգոստոսի 17-ին կայացած հանրահավաքին:
Նրա խոսքով՝ Հայաստանի երկրորդ նախագահ Ռոբերտ Քոչարյանի դեմ առաջադրված մեղադրանքները ճիշտ էին եւ հիմնավորված:
«Կարծում եմ, որ 2008 թվականի մարտի 1-ի դեպքերի վերաբերյալ քրեական գործը պետք է տանել մինչեւ վերջ: Կարծում եմ, որ Հայաստանի Վերաքննիչ դատարանը Ռոբերտ Քոչարյանի գործով որոշում կայացրել, որը, առնվազն, վիճելի է: Հույս կա, որ Հայաստանի Վերաքննիչ դատարանն այս գործով դատական ակտ կհրապարակի, որը ոչ ոքի մոտ կասկածներ չի հարուցի: Ես նաեւ կարծում եմ, որ Հայաստանի երրորդ նախագահ Սերժ Սարգսյանը եւս պետք է քրեական հետապնդման ենթարկվի մարտի 1-ի գործով»,- նշեց փաստաբանը:
Բացի այդ, ըստ Նորիկյանի, Հայաստանում կոռուպցիայի դեմ պայքարը պետք է տարվի մինչեւ վերջ, եւ բոլոր նրանք, ովքեր երբեւէ նման հանցանք են գործել, պետք է պատասխանատվության ենթարկվեն դրա համար: Նրա խոսքով՝ Հայաստանում կոռուպցիոն երեւույթները պետք է լիովին վերացվեն, ներառյալ՝ «քաղաքական կոռուպցիայի» դրսեւորումները, որոնք, ըստ փաստաբանի, արմատավորվել են մեր հասարակության մեջ: