Չեչնիայում դանակներով զինված երկու անձ փորձել է ներխուժել ՆԳՆ-ի՝ Շալինի շրջանի բաժանմունքի տարածք: Այս մասին հայտնում է «ՌԻԱ Նովոստի»-ն՝ վկայակոչելով հանրապետության ներքին գործերի նախարարության մամուլի ծառայությունը:
Տուժել է երկու ոստիկան: Հարձակվողները սպանվել են: Բացի այդ, ոստիկանական բաժանմունքի վրա հարձակման ժամանակ վիրավորվել է մի կին, փոխանցու է «Մեդուզա»-ն:
«ՏԱՍՍ»-ը, վկայակոչելով աղբյուրը, գրում է, որ հանցագործների մոտ պայթուցիկ է եղել: Ոստիկանները պահանջել են, որպեսզի հարձակվողները կանգ առնեն, ինչից հետո վերջիններս հանել են դանակները: Ոստիկանության աշխատակիցներից մեկը ձախ ուսի վնասվածք է ստացել:
Օգոստոսի 20-ին ոստիկանների եւ զինյալների միջեւ փոխհրաձգություն է տեղի ունեցել նաեւ Գրոզնիում՝ Պերվոմայսկայա եւ Իսաեւի փողոցների խաչմերուկում: «ՌԻԱ Նովոստի»-ն, վկայակոչելով աղբյուրը, գրում է, որ այս դեպքում մի ոստիկան է սպանվել:
«Ինտերֆաքս»-ի աղբյուրը հաղորդել է Չեչնիայում տեղի ունեցած հարձակման հետեւանքով տուժած երեք ոստիկանի մասին: Գործակալության զրուցակիցը նաեւ հաստատել է, որ եւս մեկ ոստիկան սպանվել է:
Անանուն աղբյուրները հայտնում են նաեւ Չեչնիայում իրավապահների վրա իրականացված այլ հարձակումների մասին: Mash տելեգրամ ալիքի հաղորդմամբ՝ Գրոզնիի Մինուտկա հրապարակում զինյալն ավտոմեքենայով վրաերթի է ենթարկել ճանապարհային ոստիկանության աշխատակցին: Չհաստատված տվյալների համաձայն՝ մինչ այդ հանցագործը պայթուցիկ սարք է նետել ոստիկանների ուղղությամբ, սակայն այն չի պայթել (ըստ այլ աղբյուրների՝ ռումբը պայթել է): Հարձակվողը եւ նրա հետ ավտոմեքենայի մեջ գտնվող դեռահասը սպանվել են: Երեք ոստիկան վիրավորվել է:
Հաղորդվում է նաեւ Չեչնիայի Շալինի շրջանում ճանապարհա- պահակային ծառայության աշխատակիցների վրա հարձակման մասին: Հանցագործն ինքնապայթեցում է իրականացրել: Իրավապահ մարմինների աշխատակիցները ու քաղաքացիները, ըստ աղբյուրի, չեն տուժել: