Մենք օգտվելու ենք այլ երկրների անցումային արդարադատության փորձից եւ չենք կրկնելու նրանց սխալները: Այս մասին այսօր՝ օգոստոսի 21-ին, իր պաշտոնավարման 100 օրն ամփոփող ասուլիսի ժամանակ հայտարարեց ՀՀ Արդարադատության նախարար Արտակ Զեյնալյանը:
«Մենք ուզում ենք, որ մեզ մոտ լինի օրինականը, ամենաարդարը եւ ամենանախանձելին, ինչպիսին որ հեղափոխությունը եղավ»,-ասաց նախարար Զեյնալյանը:
Նախարարի խոսքով՝ այս ոլորտում ուսումնասիրություն է կատարվում եւ ուսումնասիրվելու է Վրաստանի եւ այլ երկրների փորձը:
«Արտակարգ դատարաններ չեն ստեղծվելու, անցումային արդարադատությունը չի հակասելու ՀՀ Սահմանադրությանն ու կոնվենցիաներով, միջազգային պայմանագրերով ստանձնած պարտավորություններին: Դա լինելու է օրինական: Չեն լուծարվելու դատարանները, դատարանների դատարան չի ստեղծվելու, Սահմանադրություն չի խախտվելու»,-ասաց նա:
Նշենք, որ օգոստոսի 17-ին ՀՀ վարչապետ Նիկոլ Փաշինյանը հանրահավաքի ժամանակ հայտարարել էր երկրում անցումային արդարադատության մարմիններ անհրաժեշտության մասին: