Մաքսային ծառայության նախկին ղեկավար Արմեն Ավետիսյանը երեկ հրավիրվել է ԱԱԾ քննչական վարչություն, սակայն թե ինչ կարգավիճակով, տեղյակ չեմ։ Այս մասին այսօր՝ հոկտեմբերի 16-ին, լրագրողների հետ զրույցում հայտնեց ԱԱԾ տնօրեն Արթուր Վանեցյանը՝ հավելելով, որ սկզբում հրավիրվել է որպես վկա, իսկ հետագա ընթացքի մասին ինքը դեռ տեղյակ չէ։
Վանեցյանը շեշտեց՝ չեն ասել, որ Ռոբերտ Քոչարյանի ընտանիքը կապված է «Գոլդեն Փելես» հյուրանոցների հետ։
Իսկ Արմեն Ավետիսյանի որդու մասին տարածած հաղորդագրության մասով հարցին՝ ճի՞շտ էր նման տեսանյութ տարածելը, երբ այդ պահին Արմեն Ավետիսյանը կասկածյալի կարգավիճակ չուներ, հնարավո՞ր է հետագայում պարզվի, որ այդ հյուրանոցների հետ նա առնչություն չունի, Վանեցյանն ասաց. «Հավատացեք, չի պարզվի։ Օֆշորային գոտում գրանցված կազմակերպությունները, որոնցով կառուցվել են 3 հյուրանոցները, գրանցված են Արմեն Ավիտիսյանի որդու եւ մոր անունով։ Դա հաստատված փաստ է, որը նախկինում ներկայացվել է որպես Կիպրոսից ներդրում»։
ԱԱԾ տնօրենը նկատեց՝ միայն այն փաստը, որ Արմեն Ավետիսյանի ներկայացրած եկամուտների մեջ չունի այն օրինական գումարները, որոնցով կառուցվել են այդ հյուրանոցները, արդեն իսկ բավարար հիմք է մարդուն մեղադրանք ներկայացնելու համար։
Ավելի վաղ ԱԱԾ–ն հաղորդագրություն էր տարածել, որում, մասնավորապես, ասված էր. «Հայաստանի Հանրապետության ազգային անվտանգության ծառայության քննչական վարչությունում հարուցվել է քրեական գործ ՀՀ մաքսային պետական կոմիտեի նախկին նախագահ Արմեն Ավետիսյանի կողմից ձեռնարկատիրական գործունեությանն ապօրինի մասնակցելու եւ հանցավոր ճանապարհով ստացված առանձնապես խոշոր չափերով գումարներն օրինականացնելու (փողերի լվացում) դեպքի առթիվ` նախատեսված ՀՀ քրեական օրենսգրքի 310-րդ հոդվածով եւ 190-րդ հոդվածի 3-րդ մասի 1-ին կետով: Ձեռնարկված օպերատիվ-հետախուզական միջոցառումների եւ քննչական գործողությունների արդյունքում ստացված նախնական տվյալների համաձայն, Արմեն Ավետիսյանը, 2001 թվականից զբաղեցնելով ՀՀ մաքսային պետական կոմիտեի նախագահի պաշտոնը, իր հետ գործնական կապերի մեջ գտնված անձանց հետ համատեղ ձեռնարկել եւ հիմնականում կանխիկ գումարներով ֆինանսավորել է Երեւանի Ազատության պողոտայում գտնվող «Գոլդեն Փելես» հյուրանոցային համալիրի կառուցումը: Իր եւ մյուսների մասնակցությունը, ինչպես նաեւ ֆինանսավորման աղբյուրը քողարկելու նպատակով հյուրանոցի կառուցումը վերագրվել է Կիպրոսի օֆշորային գոտում հիմնադրված «Ռիվերհիլ Հոլդինգս» ՍՊ ընկերությանը` հանրությանը այդկերպ մոլորեցնելով, թե հյուրանոցի կառուցման համար ծախսված միլիոնավոր ԱՄՆ դոլարներն իբր ՀՀ-ում օտարերկրյա ներդրում են: Արմեն Ավետիսյանն անձամբ վերահսկելով շինարարական աշխատանքների ընթացքը, իր պաշտոնական դիրքն օգտագործելով, առանձին դեպքերում նաեւ նպաստել է հյուրանոցի կառուցման ընթացքում ծագած տարաբնույթ խնդիրների լուծմանը: Հատկանշական է, որ օտարերկրյա ներդրումներով հյուրանոցը կառուցված լինելու փաստարկն ավելի համոզիչ դարձնելու համար 2005 թվականին հյուրանոցի բացման արարողության ժամանակ հանրությանը, որպես օտարերկրյա ներդրող ներկայացվել է իրականում այդ ընկերության գործունեության հետ որեւէ կապ չունեցող Լիբանանի քաղաքացու, ով որոշ ժամանակ նույն հյուրանոցում աշխատել է ընդամենը որպես տնօրեն: Այնուհետեւ, ընդլայնելով հյուրանոցային բիզնեսը` նույն կազմակերպության անունից 2010-2012 թթ. Ծաղկաձորում կառուցվել է «Գոլդեն Փելես» հյուրանոցը: 2012 թվականին վերը նշված երկու հյուրանոցների սեփականատեր դարձել է Անգլիայի Դուգլաս քաղաքում հիմնադրված «Գոլդեն գրուպ լիմիտեդ» ՓԲԸ-ն, որի 100 տոկոս բաժնետեր հանդիսացել է Արմեն Ավետիսյանի որդին՝ Արտաշես Ավետիսյանը: Հետագայում` 2018 թվականին, Արմեն Ավետիսյանի եւ նրա որդու կողմից Երեւանի Հյուսիսային պողոտայում հիմնադրվել է երրորդ` «Գոլդեն փելես բուտիկ» հյուրանոցը: Ի դեպ, վերոնշյալ երեք հյուրանոցների շուկայական ընդհանուր արժեքը 2016 թվականին գնահատվել է շուրջ 90 մլն ԱՄՆ դոլար: Կատարվում է նախաքննություն: Քրեական գործի շրջանակներում իրականացվում են լայնածավալ օպերատիվ-հետախուզական միջոցառումներ եւ անհետաձգելի քննչական գործողություններ` հյուրանոցների կառուցման համար ներդրված միլիոնավոր դոլարների ծագման իրական աղբյուրը, փաստացի ներդրողներին եւ հնարավոր մյուս սեփականատերերին պարզելու ուղղությամբ»։