Femen ֆեմինիստական շարժման ներկայացուցիչները Փարիզում բողոքի ակցիա են կազմակերպել, որտեղ անցկացվելու են Առաջին աշխարհամարտի ավարտի 100-ամյակին նվիրված միջոցառումներ, հայտնում է BFM TV-ն:
Ակցիան սկսվել է տեղական ժամանակով առավոտյան մոտ 08:00-ին: Մինչեւ գոտկատեղը մերկացած երեք աղջիկներ կանգնել են Հաղթական կամարի դիմաց եւ քաղաք ժամանող համաշխարհային առաջնորդներին դիմավորել «Բարի գալուստ, ռազմական հանցագործներ» պաստառներով:
Հաղորդվում է, որ ոստիկաններն աղջիկներին ձերբակալել են:
Փարիզում նոյեմբերի 11-ին Հաղթական կամարի մոտ կհավաքվեն տարբեր պետություններից ավելի քան 70 պատվավոր հյուրեր՝ նշելու Առաջին աշխարհամարտի ավարտի 100-ամյակը:
Femen շարժումը ստեղծվել է 2008 թվականին Ուկրաինայում, ավելի ուշ պաշտոնապես գրանցվել է Ֆրանսիայում եւ մասնաճյուղ է ստեղծել Գերմանիայում: Նրա մասնակիցները հանդես են գալիս սոցիալական անարդարության եւ գենդերային խտրականության դեմ, ինչպես նաեւ քննադատում են եկեղեցուն եւ առանձին քաղաքական գործիչների:
Կազմակերպությունը հանրահայտ է դարձել բողոքի ակցիաների ժամանակ ուշադրություն գրավելու համար իր անդամների կողմից կուրծքը մերկացնելով: