Հայաստանը պետք է զարգացած ատոմային էներգետիկա ունեցող երկիր մնա: Այս մասին նոյեմբերի 21-ին մամուլի ասուլիսի ժամանակ ասաց էներգետիկայի ենթակառուցվածքների եւ բնական պաշարների նախարարի պաշտոնակատար Գարեգին Բաղրամյանը:
Նա նշեց, որ Մեծամորի ատոմային էլեկտրակայանների նման ԱԷԿ-երը արդեն 60 տարվա շահագործման պրակտիկա ունեն, որոնց թույլտվությունը ԱԷՄԳ-ն է տալիս: Հայկական ատոմակայանի շահագործման ժամկետը 40 տարի է, այժմ այն երկարացվել է եւս 10 տարով:
«Հայկական ատոմակայանի 10 տարվա ժամկետի ավարտից հետո նրա ռեակտորը մանրամասն ստուգվելու է եւ Հայաստանը կայանի անվտանգ աշխատանքի երկարաձգման համար համապատասխան թույլտվություններ կստանա, եթե պարզվի, որ այն դեռ կարող է աշխատել: Ինչպես հայտնի է, ԱԷԿ-ի անվտանգությունը երբեք այսքան բարձր չի եղել, որքան այսօր», - նշեց նախարարի պաշտոնակատարը եւ հավելեց, որ կայանի ժամկետի երկարաձգումը ցույց կտան հետազոտության արդյունքները:
Բաղրամյանը նաեւ նշեց, որ Հայաստանում նոր ատոմակայանի կառուցման հարցը օրակարգում է: Նա նաեւ նշեց, որ միջազգային շուկաներում տեղակայված ցածր հզորությամբ մոդուլային ատոմակայանները բավականին ճկուն են Հայաստանի էներգետիկ համակարգի համար:
«Այդպիսի կայանների ներմուծման հարցը քննարկվում է, գները եւ պայմանները այժմ դիտարկվում են», - ասաց Բաղրամյանը: