Անթույլատրելի է դատարանի վրա հրապարակային ճնշում գործադրելը: Հունվարի 14-ին լրագրողների հետ հանդիպմանն այս մասին ասաց Մանվել Գրիգորյանի փաստաբան Լեւոն Բաղդասարյանը:
Նրա խոսքով՝ սա հիշեցնում է նախաքրիստոնեական դարաշրջանի ժամանակները:
«Դատական համակարգը հատուկ վերաբերմունքի կարիք ունի: Ի՞նչ է նշանակում այն, որ բողոքողները ակցիա են անցկացնում՝ դատարանից պահանջելով Մանվել Գրիգորյանին կալանավորելու մասին որոշում կայացնել: Նման պայմաններում անհնար է խոսել անկախ դատական համակարգի մասին», - ասաց նա:
Լեւոն Բաղդասարյանն ընդգծեց, որ ավելի մեծ վրդովմունք է առաջացնում այն, որ գլխավոր դատախազը դուրս է գալիս բողոքի մասնակցիների մոտ եւ ասում, որ որոշման բողոքարկման համար պատրաստվում է դիմել դատարան՝ փոխանակ կոչ անելու հարգել դատարանը:
«Կարծում եմ, որ մենք արժանի ենք արժանավոր իրավապահ համակարգ ունենալ, որն առաջնորդվում է ոչ թե զգացմունքներով, այլ փաստերով եւ օրենքներով», - հավելեց նա:
Ինչ վերաբերում է Մանվել Գրիգորյանին կալանքի տակ պահելու հիմքերին, ապա Լեւոն Բաղդասարյանի կարծիքով, դրանք չկան:
«Ոչ մի հիմք չկա կարծելու, որ Մանվել Գրիգորյանը, գտնվելով ազատության մեջ կարող է խաչընդոտել իրավապահ մարմինների եւ դատարանի աշխատանքին», - ասաց նա:
Ավելի վաղ հաղորդվել էր, որ բողոքի ակցիայի մասնակիցները հունվարի 12-ին փակել էին Զվարթնոց օդանավակայան տանող ճանապարհը:
Դեկտեմբերի 21-ի երեկոյան Երեւանի ընդհանուր իրավասության դատարանը որոշում էր կայացրել 25 միլիոն դրամ գրավի դիմաց ազատ արձակել Մանվել Գրիգորյանին: Այս որոշումը դատախազության կողմից բողոքարկվել էր Վերաքննիչ դատարանում: Կալանքի մասին որոշումը ընդունվել էր 2018 թվականի հունիսի 19-ին Երեւանի ընդհանուր իրավասության դատարանի նախագահող դատավոր Մարինա Մելքոնյանի կողմից:
Մանվել Գրիգորյանը մեղադրվում է զենքի եւ զինամթերքի ապօրինի պահման եւ առանձնապես մեծ չափերի յուրացման մեջ: