Անցյալ տարվա ձեռքբերումների եւ 2019 թվականի նպատակների, նոր համերգային շրջանի ծրագրի մասին NEWS.am-ի թղթակցին պատմել է Հայաստանի պետական սիմֆոնիկ նվագախմբի հիմնադիր, գեղարվեստական ղեկավար և գլխավոր դիրիժոր Սերգեյ Սմբատյանը:
Ինչպիսի՞ն էր 2018-ը Ձեր եւ Հայաստանի պետական սիմֆոնիկ նվագախմբի համար
Անցյալ տարին բեկումնային էր նվագախմբի համար, գեղարվեստական առումով տարին լի էր նշանակալի ձեռքբերումներով: 2018-ին մենք նոր կարգավիճակ ստացանք, դարձանք Հայաստանի պետական սիմֆոնիկ նվագախումբ, ինչն ավելի շատ մեզ ոգեշնչեց:
Մենք ֆանտաստիկ հյուրախաղեր ունեցանք Մալթայում, որտեղ սիմֆոնիկ նվագախումբը ռեզիդենտ նվագախումբ էր, ելույթ ունեցանք նաեւ Էլբի ֆիլհարմոնիայում (Elbphilharmonie), որտեղ տոմսերը համերգից մի քանի ամիս առաջ էին վաճառվել:
Հայաստանում եւ արտասահմանում մեր համերգներն ուղղված են հայկական մշակույթի քարոզչությանը: Մեր երաժշտությունը պետք է լսելի լինի ողջ աշխարհում: Աշխարհում քիչ գիտեն հայկական մշակույթի մասին: Եվ մենք, համեստ հնարավորություններ ունենալով, պետք է ներկայացնենք մեր աժեքները, մեր հերոսներին:
Ի՞նչ է հաջողվել իրականացնել տարվա ընթացքում, ինչը անհնար կամ անիրական էր թվում
Որպես կանոն, մենք մեր առջեւ բարձր նպատակներ ենք դնում: Առաջին հայացքից, թվում, է, որ դրանք անիրական են: Սակայն, երբ նպատակին հասնելու մեծ ցանկություն կա, կա հստակ պատկերացում, թե ինչ քայլեր է պետք ձեռնարկել, դրանք կյանքի կոչելու համար եւ ամենակարեւորը կա թիմ, որը գիտի, ինչ անել եւ համախմբված աշխատում է, անգամ ամենաանհավական ծրագրերը կարելի է հաղթահարել:
Օրինակ, առաջին հայացքից անհնար էր թվում այն, ինչ նվագախումբն արեց Մալթայհի միջազգային երաժշտական փառատոնի շրջանակում: Երկու շաբաթ ամեն օր մենք տարբեր մենակատարների հետ տարբեր համերգային ծրագրեր էինք նվագում: Մենք այդ անհավանական աշխատանքն արեցիք երաժշտությանը մեր նվիրվածության շնորհիվ:
Ընդհանրապես, աշխարհի հեղինակավոր դահլիճներում նվագելով, նվագախմբի ռազմավարությունն ու առաքելությունն է ցույց տալ, որ Հայաստանում կա միջազգային ստանդարտի թիմ: Եվ մենք մեծ պատասխանատվությամբ ենք իրականացնում մեր առաքելությունը:
Ո՞րն էր Սերգեյ Սմբատյանի անձնական եւ դիրիժոր Սերգեյ Սմբատյանի ձեռքբերումը
Ես հաճախ եմ հանգում այն մտքին, որ իմ հաջողությունները, իմ ձեռքբերումները շատ դեպքերում կապված են նվագախմբի հաջողությունների հետ: Սա, թերեւս, տարվա ամենամեծ նվաճումն է:
Ո՞րն է 2019 թվականին Հայաստանի պետական սիմֆոնիկ նվագախմբի համար ձեր տեսլականը
2019-ին մենք կշարունակենք մեր բոլոր ծրագրերը, բնականաբար, դրանց նոր շունչ հաղորդելով: Մենք նաեւ շատ հետաքրքիր նախաձեռնություններ ունենք: Մոտ 60 համերգ է նախատեսված, կան Եվրոպայից եւ Ասիայից հրավերներ: Մենք նաեւ Հայաստանում նոր լսարան գրավելու ձեւավորելու նպատակ ենք դրել:
Կշարունակենք մեր աշխատանքը, որն ուղղված է հայկական մշակույթի պահպանմանը, զարգացմանը եւ քարոզչությանը: Տարին հագեցած կլինի համերգներով եւ փառատոններով:
2019-ին «Ժամանակակից լեգենդներ» փառատոն կկազմակերպվի, որն այս տարի նվիրված է կոմպոզիտոր Տիգրան Մանսուրյանի 80-ամյակին:
Այս տարվա նոյեմբերին նվագախումբը Ժամանակակից կոմպոզիտորների փառատոն կկազմակերպի՝ Հայաստան հրավիրելով այնպիսի լեգենդար կոմպոզիտորների, ինչպիսիք են Կշիշտոֆ Պենդերեցկին, Գիա Կանչելին եւ այլ անվանի կոմպոզիտորների:
Մենք նաեւ հետագայում կամրապնդենք մեր համագործակցությունը հայտնի արտասահմանյան ԶԼՄ-ների հետ: Այդ կապերի շնորհիվ մենք աշխարհում քարոզում ենք հայկական կատարողական արվեստը եւ հայկական կոմպոզիտորական դպրոցը:
Ես շնորհակալ եմ բոլորին, ովքեր հետեւում են նվագախմբի գործունեությանը, ոգեշնչվում են նվագախմբի հաղթանակներով եւ ոգեշնչում են կոլեկտիվին: Դա մեզ նոր ստեղծագործական էներգիա է տալիս: