Պետության գործունեության հիմքում պետք է ղարաբաղյան խնդիրը լինի: Փետրվարի 11-ին լրագրողների հետ հանդիպման ժամանակ այս մասին ասաց «Մարդկային զարգացման միջազգային կենտրոն» հասարակական կազմակերպության նախագահ Թեւան Պողոսյանը:
Նրա խոսքով՝ դրան պետք է ուղղված լինի նաեւ Կառավարության ծրագիրը, քանի որ առանց այդ բաղադրիչի չի կարելի խոսել այլ գաղափարների իրականացման մասին:
«Շատ կարեւոր է, որ իշխանությունները անընդհատ բարձրացնում են այն հարցը, որ Ղարաբաղը պետք է վերադառնա բանակցային սեղանին, եւ առանց Ստեփանակերտի մասնակցության անհնար է լուծել ղարաբաղա-ադրբեջանական սահմանի անվտանգության եւ տարածքների հարցը: Չի կարելի ինչ-որ ժամկետների վրա կենտրոնանալ: Ղարաբաղյան հիմնախնդրի լուծումը կարող է հարյուր տարի տեւել, ճիշտ այնպես, ինչպես սկսվեց հարյուր տարի առաջ եւ դեռ չի լուծվել», - ասաց փորձագետը:
Պողոսյանը կածում է, որ Ադրբեջանի նախագահի եւ Հայաստանի վարչապետի հանդիպումների ժամանակ կարող են հազարավոր այլ հարցեր քննարկվել: «Անվտանգության ապահովման հետ կապված հարցեր, փախստականների խնդիրները, քաղաքացիական հասարակության ներկայացուցիչների միջեւ շփումները եւ այլն: Այս իմաստով իշխանությունները չեն շեղվում այն հայտարարությունից, որ Լեռնային Ղարաբաղը պետք է վերադառնա բանակցային սեղանին: Եթե խոսքը Ղարաբաղի կարգավիճակի մասին է, ապա այն չի կարող որոշվել առանց Ստեփանակերտի մասնակցության », - հավելեց նա:
Փորձագետի կարծիքով, անվտանգության խնդիրը պետք է ավելի լայնորեն դիտարկել: «Եթե Ալիեւը հավակնում է ոչ միայն Ղարաբաղի տարածքին, այլեւ Երեւանի, դա նշանակում է, որ սահմանի անվտանգության մասին մեր ընկալումը պետք է ավելի լայն լինի: Ակնհայտ է, որ Երեւանի անվտանգությունը սկսվում է Ղարաբաղի սահմանների անվտանգության ապահովումից», - եզրափակեց Թեւան Պողոսյանը: