Մարտի 1-ի գործը, դրա վերաբերյալ զարգացումները տեղ են գտնելու ՄԻՊ-ի տարեկան զեկույցում, որը հիմա պատրաստում ենք: Այս մասին, այսօր՝ փետրվարի 11-ին, Աժ-ում լրագրողների հետ զրույցում նշել է ՀՀ մարդու իրավունքների պաշտպան Արման Թաթոյանը:
Նա տեղեկացրեց, որ հարցումներ են արել քննչական մարմիններին, դատախազությանը՝ յուրաքանչյուրն իր իրավասությանը վերաբերող հարցերով:
«Եթե նախորդ տարի անդրադարձ էր կատարվում 10 զոհերի հետ կապված քննությանը, հիմա, բնականաբար, ավելացել է նաեւ սահմանադրական կարգի տապալման հետ կապված մասը: Որքանով մեր իրավասությանը վերաբերում է, դրա առավելագույն չափով այդ հարցը տեղ կգտնի տարեկան զեկույցում:
Օրինակ, ենթադրենք ՄԻՊ-ի կողմից միշտ նշվել է, որ 10 զոհերի հետ կապված քննությունը դանդաղում է, բավարար միջոցներ չեն ձեռնարկվում, հանրային բավարար տեղեկատվություն չի տրվում: Դա այս պահին էլ զեկույցում կա: Բայց քանի որ նոր բաղադրիչ է ավելացել, դրան եւս անդրադարձ կլինի»,-ընդգծեց Թաթոյանը: