Հարկավոր է ուժեղացնել կաթնամթերքի արտադրության վերահսկողությունը: Փետրվարի 21-ին «Կաթնամթերքի հայկական շուկայում առկա խնդիրների բացահայտումը եւ դրանց լուծման ուղիները» քննարկման ժամանակ այս մասին ասաց Գյուղատնտեսության նախարարության սննդամթերքի անվտանգության պետական ծառայության սննդամթերքի արտադրության վերահսկողության բաժնի ղեկավար Վահե Դանիելյանը:
Նրա խոսքով՝ այսօր տվյալ ոլորտում կաթի մանրէազերծման վերահսկողության, ինչպես նաեւ արտադրանքի բաղադրության համապատասխանության եւ անվանման խնդիր կա:
«Ապրանքի պիտակի վրա պետք է մատչելի ձեւով նշված լինի արտադրանքի բաղադրությունը, որպեսզի չլինի այնպես, որ օրինակ թթվասերի փոխարեն վաճառվի փոխարինողի հավելումներով արտադրանք», - ասաց պաշտոնյան:
Նա նշեց, որ դեմ է այն մոտեցմանը, որի համաձայն բուսական յուղերը կամ կաթի փոշին զուգորդվում են վնասակար հավելումների հետ:
«Խնդիրը բնական կաթի եւ այն արտադրանքի միջեւ հստակ տարանջատումն է, որում կան այս կամ այն հավելումները: Սա կօգնի բացառել այն դեպքերը, երբ արտադրողը, փորձելով գերշահույթ ապահովել, մոլորության մեջ է գցում սպառողին», - ասաց Դանիելյանը:
Նա ընդգծեց, որ վերահսկողության բարձրացման լրացուցիչ մեխանիզմ է համապատասխանության հայտարարագրումը:
«Այս գործընթացը անցկացվում է մեր ստուգումների արդյունքում՝ մեր լաբորատորիայում նորագույն տեխնոլոգիաների կիրառմամբ եւ նախատեսված է ինչպես տեղական արտադրողների, այնպես էլ ներկրվող արտադրանքի համար», - եզրափակեց Վահե Դանիելյանը:
Նշենք, որ այս հանդիպում քննարկումը կազմակերպել են ՀՀ ԿԵ սննդամթերքի անվտանգության տեսչական մարմինը, «Ռազմավարական Զարգացման Գործակալություն» ՀԿ հետ համատեղ:
Միջոցառմանը ներկա էին շուրջ 60 կաթ վերամշակողներ Հայաստանի տարբեր մարզերից, ՊԵԿ, ՀՀ Գյուղատնտեսության նախարարության, ՀՀ ԱԺ՝ տարածքային կառավարման, տեղական ինքնակառավարման, գյուղատնտեսության և բնապահպանության հարցերի մշտական հանձնաժողովի ներկայացուցիչներ, ինչպես նաև ոլորտում գործունեություն ծավալող մի քանի ՀԿ-ներ: