Օրենքի շրջանակում կարող է գոյություն ունենալ վերահսկվող գնաճ, որը չի գերազանցի 4 տոկոսը։ Այս մասին մարտի 25-ին խորհրդարանի Տնտեսական հարցերի մշտական հանձնաժողովի նիստում, բարեփոխումների իրականացման գործընթացի եւ ձեռք բերված արդյունքների մասին զեկույցի քննարկման ժամանակ ասաց տնտեսական զարգացման եւ ներդրումների նախարար Տիգրան Խաչատրյանը։
Բայց միեւնույն ժամանակ, ինչպես նշեց նախարարը, այդ աճող գները ձեռնարկություններին եկամուտ են ապահովում։ «Նկատվում է աշխատավարձի որոշակի բարձրացում, ինչը տնտեսական աճի նախադրյալներից մեկն է, իսկ առանց չափավոր գնաճի տնտեսական աճ տեղի չի ունենում»,- պարզաբանել է Խաչատրյանը։
Անդրադառնալով գնաճի պայմաններին՝ պաշտոնյան հավելեց, որ գնաճը պայմանավորված է տնտեսությունում սահմանափակ ռեսուրսներով, եւ տնտեսվարող սուբյեկտների պայքարն այդ ռեսուրսների համար ստիպում է նրանց ավելի շատ վճարել, քան նրանք վճարում էին մինչ այդ։ «Այսինքն՝ սահմանափակ ռեսուրսի պահանջարկը առաջ է բերում գնաճ»,- ընդգծել է նախարարը եւ հավաստիացրել, որ Կենտրոնական բանկը եւ կառավարությունը վերահսկում են գնաճի մակարդակը։