Իսպանական շինարարական ընկերությունը 17 այլ ընկերություններին ավելի քան 1.5 մլրդ դրամ է պարտք: Մարտի 25-ին Կառավարության նիստից հետո լրագրողներին այս մասին ասաց ՀՀ տրանսպորտի, կապի եւ տեղեկատվական տեխնոլոգիաների նախարար Հակոբ Արշակյանը:
Նախարարի խոսքով «Կապալառո» ընկերությունը ( «Կոստիան Կոնկորդ» իսպանական ընկերություն) ընկերությունների հետ պայմանագիր է կնքել, որպեսզի նրանք օգնեն Տրանշ-2 փուլի շրջանակում Աշտարակ-Թալին ճանապարհահատվածի շինարարական աշխատանքների իրականացման գործում:
«Թե ինչու վճարումները չեն կատարվել, մեզ հայտնի չէ»,- նշեց Արշակյանը: Նախարարը հավելեց, որ պետությունն ամբողջությամբ կատարել է իր պարտավորությունները:
«Բանակցություններ են ընթանում իսպանական ընկերության հետ: Առաջիկայում սպասում ենք իսպանական ընկերության ներկայացուցիչների այցին բանակցությունները շարունակելու համար»,- եզրափակեց նա: