Թուրքիայի իշխանությունները քրդերի ցեղասպանություն են պատրաստում: Այս մասին Ahval պորտալի հետ հարցազրույցում հայտարարել է «Դեմոկրատական միության» քրդամետ կուսակցության համանախագահ Աիշա Հասսուն:
Նա հերքել է Անկարայի այն պնդումները, որ Սիրիայի քրդերը սպառնում են Թուրքիայի ազգային անվտանգությանը՝ հայտարարելով, որ երկրի կառավարությունը սա օգտագործում է որպես արադարացում Սիրիայի հյուսիս-արեւելքում գտնվող շրջաններ ներխուժելու համար: Հասսուն նշել է, որ Թուրքիան չի ընդունում որեւէ ինքնավար քրդական կազմավորման գոյությունը:
«Թուրքիան քրդերի ցեղասպանության մասին որոշում է ընդունել, քանի որ հենց նրանց է համարում առաջին եւ վերջին թշնամի, այլ ոչ թե ԻՊ կամ «Ան Նուսրա ճակատի» եւ ջիհադականների այլ խմբավորումների գրոհայիններին, որոնք հավատում են «Ալ Քաիդայի» գաղափարախոսությանը»,- նշել է քաղաքական գործիչը՝ Սիրիայում Թուրքիայի քաղաքականությունն անվանելով «գաղութարարական նախագիծ, որն ապացուցվել է Իդլիբի, Աազազա ալ Բաբայի, Աֆրինի եւ Ջարաբուլասի օկուպացիայով»:
«Թուրքիան փորձում է ներխուժել տարածաշրջան: Թուրքական կարգավորման նախագծի վտանգավորությունն այն է, որ դա առաջին հերթին կախված է կրոնական ասպեկտից եւ սալաֆիների եւ ԻՊ-ից, «Ան Նուսրա ճակատի» եւ ջիհադիստների այլ խմբավորումների ահաբեկիչների օգտագործումից, որոնք այսօր հավաքված են Իդլիբում: Եվ այս ամենը ծրագրել է Էրդողանը: «Արդարություն եւ զարգացում» կուսակցության քաղաքականությունը սպառնալիք է ներկայացնում Մերձավոր Արեւելքի եւ ամբողջ աշխարհի համար»,- ասել է Հասսուն: