«Գազպրոմ Արմենիա» ընկերությունում քննարկվում է աշխատակիցների կրճատման հարցը: Այս մասին NEWS.am-ի հարցմանն ի պատասխան հայտնում են «Գազպրոմ Արմենիա»-ի լրատվական ծառայությունից:

«Ներկայում աշխատանքային քննարկումներ են ընթանում համալիր հարցերի շուրջ, այդ թվում դիտարկելով նաեւ խնայողությունների հարցը: Օրակարգում է նաեւ հաստիքացուցակների վերանայման հարցը»,-հայտնում են ընկերությունից:

Հիշեցնենք, որ 2018 թվականի վերջին օրը Փաշինյանը հայտնել էր, որ ռուսական գազի գինը սահմանին կփոխվի, սակայն բնակչության համար ներքին սակագները նույնը կմնան։ Ավելի ուշ «Գազպրոմը» տեղեկացրել էր, որ «Գազպրոմ Արմենիա» դուստր ձեռնարկությունը կապույտ վառելիք է գնելու հազար խմ–ի դիմաց 165 դոլարով` նախկին 150 դոլարի փոխարեն։ Այնուհետեւ կառավարությունից պարզաբանել էին, որ սակագինը սպառողների համար կպահպանվի «Գազպրոմ Արմենիայի» ծախսերի կրճատման հաշվին։ Գազի սակագինն այսօր 1000 խմ–ի դիմաց 290 դոլար է։