Բանգլադեշում Նուսրաթ Ջահան Ռաֆիի վրա դպրոցում նավթ են լցրել եւ այրել։ Դրանից երկու շաբաթ առաջ նա բողոքել է տնօրենի հետապնդումներից՝ հայտնում է BBC-ն։
Հուսահատ վճռականությունը եւ համարձակությունը, որով նա հանդես է եկել սեռական բռնության դեմ, նրա մահը այրելուց հինգ օր հետո, այս ամենը միավորել է Բանգլադեշի բնակիչներին եւ ուշադրություն հրավիրել այդ հարավասիական պահպանողական երկրում սեռական բռնության զոհերի խոցելիության վրա։
Նուսրաթն ընդամենը 19 տարեկան էր։ Նա ծնունդով Ֆենիից էր, որը գտնվում է Դակկայից հարավ։ Աղջիկը սովորում էր հոգեւոր դպրոցում։
Մարտի 27-ին նա պատմել է, որ դպրոցի տնօրենը հրավիրել է իրեն աշխատասենյակ եւ մի քանի անգամ ձեռք տվել իրեն անթույլատրելի կերպով։ Նուսրաթը փախել է։
Նա դիմում է ներկայացրել ոստիկանություն, բայց աղջկա անվտանգությունը ապահովելու փոխարեն՝ սպան նկարահանել է նրան բջջային հեռախոսով։
Կադրերում Նուսրաթը լալիս է, երեւում է, որ վախեցած է եւ շփոթված։ Տեսագրությունը սպան փոխանցել է լրատվամիջոցներին, եւ այն արագ տարածվել է սոցցանցերում։
Աղջկա հայտարարությունից հետո տնօրենին ձերբակալել են, սակայն բոլորը մեղադրել են աղջկան եւ պահանջել ազատ արձակել տնօրենին։
Նուսրաթի ընտանիքի անդամները ասել են, թե գիտակցում էին, որ աղջկան վտանգ է սպառնում։