Ֆեյսբուքի ուղիղ եթերում Նիկոլ Փաշինյանի երկար-բարակ խոսքը հերթական մաստեր կլասն էր երկար խոսելու եւ ոչինչ չասելու: Այս մասին, այսօր՝ ապրիլի 20-ին, Facebook-ի իր էջի ուղիղ եթերում նշել է ՀՀԿ փոխնախագահ Արմեն Աշոտյանը՝ հավելելով, որ ուղիղ եթերում Նիկոլ Փաշինյանն ասաց մի շարք հին ու նոր ստեր:

«Նա կարծեք թե այդ ֆեյսբուքյան ասուլիսը հրավիրեց բացառապես սեփական  ընկալումների շրջանակներում PR անելու համար: Փաշինյանի ասուլիսի մի զգալի մասը նվիրված էր իր խոստումների իբր թե կատարմանը: Դնում եմ մի կողմ, որ «100 տոկոս կատարել եմ» ձեւակերպումը կոռեկտ չէ, բայց մի քանի փաստ պարզապես աղաղակող են:

Փաշինյանն ասում է, որ իր խոստումը կարճ ժամանակում բյուջեն 30-40 տոկոսով ավելացնելու մասին այլեւս իրականություն է դառնում, որովհետեւ 2018-ին բյուջեի եկամտային մասն ավելացել է 10 տոկոսով, իսկ 2019-ին կանխատեսում է մինչեւ 5 տոկոսի ավելացում: Անգամ եթե դա այդպես է, բայց պարզագույն մաթեմատիկան ցույց է տալիս, որ 2 տարվա կտրվածքով 10 եւ 5 տոկոս աճը չի տալիս իր խոստացած 30-40 տոկոսը:

Երկրորդ, բյուջեի եկամտային մասը 2018-ի համար արդեն 2017-ին նախատեսված էին, այսինքն դրանք այսպես թե այնպես պետք է ավելանային: Վստահ եմ, որ եթե չլիներ իշխանափոխություն, պետական բյուջեն էլ ավելի կմեծանար»,-ընդգծեց Աշոտյանը:

Մյուս սուտը, ըստ Աշոտյանի, այսպես ասած, «Սաշիկի արագաչափերն են»:

«Փաշինյանը փորձեց սղղացնել եւ խոսեց բացառապես այն մասին, որ հայտարարել է ամնիստիա չմուծված տուգանքների համար մոտ 25 մլն դոլար: Այդ տուգանքները ներվել են բյուջեի, այսինքն մեր եւ ձեր հաշվին: Սակայն այդպես էլ մեզ չբացատրեց, թե ինչու է մինչեւ այսօր օգտագործում «Սաշիկի արագաչափեր» ձեւակերպումը: Արդյոք այս մեկ տարվա մեջ նա կարողացել է ապացուցել, որ այդ արագաչափերը Սաշիկինն էին: Ոչ, ավելին՝ ոստիկանության նախկին բարձրաստիճան աշխատակիցներից մեկն, ով այժմ ԱԺ պատգամավոր է, մի քանի անգամ նշել է, որ այդ արագաչափերը երբեք Սաշիկ Սարգսյանին չեն պատկանել: Հարց է ծագում՝ ինչու է Նիկոլ Փաշինյանը մեր եւ ձեր ականջներին փորձում կախել այս մակարոնը: Ո՞ւր է ապացույցը»,-ասաց ՀՀԿ փոխնախագահը:

Հաջորդ թեման, որին անդրադարձավ Արմեն Աշոտյանը, «Մարտի 1»-ն է: ՀՀԿ փոխնախագահը հիշեցրեց, թե ինչպես Նիկոլ Փաշինյանը օգոստոսի 17-ին՝ իր պաշտոնավարման 100-րդ օրվա առիթով, ասաց՝ «Մարտի 1»-ը բացահայտված է. «Երեկ նա կրկնեց նույն միտքը՝ մի 2 բառ փոխելով: Նա ասաց, որ գրեթե 100 տոկոսով բացահայտված է: Կարող եմ պնդել ու ասել, որ «Մարտի 1»-ը իր ընկալումների, իր հարուցած քրեական գործի շրջանակում բացահայտված չէ, քանի դեռ բացահայտված չեն 10 զոհերի մահվան հանգամանքները եւ մահ հասցրած անձանց ինքնությունները»:

Բացի այդ, Աշոտյանի հավաստմամբ, Հայաստանում կան քաղաքական հալածյալներ, մինչդեռ Փաշինյանն իր խոսքում հակառակն է նշել. «Առնվազն Ռոբերտ Քոչարյանի նկատմամբ հարուցված քրեական գործը վկայում է այն մասին, որ Հայաստանում կա քաղաքական մոտիվներով, քաղաքական հիմքով հետապնդվող գործիչ՝ Ռոբերտ Քոչարյանը: Եվ Ռոբերտ Քոչարյանը, իմ ընկալումների մեջ, քաղաքական հալածյալ է: Հետեւաբար վրեժխնդրության եւ քաղաքական համերաշխության մասին խոսելը Փաշինյանի կողմից մանիպուլյացիոն հնարք է»:

Աշոտյանը հիշատակեց նաեւ արտաքին քաղաքականությունը՝ նշելով. «Դուք մեկ տարվա վարչապետ եք, եւ ձեզ ՀՀ ռազմավարական դաշնակիցը թիվ մեկ գործընկերը ձեզ չի հրավիրում պաշտոնական այցով: Շատ տարակուսելի խորացում է հարաբերությունների: Մյուս կողմից ԱՄՆ-ից դժգոհ էիք, որ ամերիկացիները ձեզ բավարար չափով չեն աջակցում:

Դուք ասում եք՝ բեսպրեդելը, բեսպրեդելով չեք փոխարինելու: Մինչդեռ մինչեւ ձեզ առկա կարգուկանոնը փոխարինել եք անկառավարելի քաոսով բոլոր ոլորտներում»,-ասաց նա: