Ֆրանսիայի Հանրապետության նախագահ Էմանուել Մակրոնը նամակ է հղել Հայաստանի Հանրապետության նախագահ Արմեն Սարգսյանին՝ հայտնելով, որ ինչպես հանձն էր առել, այս տարվանից սկսած ապրիլի 24-ը Ֆրանսիայում պաշտոնապես նշվում է որպես Հայոց ցեղասպանության հիշատակի օր:
Մակրոնը նշել է, որ Ֆրանսիան շարունակելու է Հայաստանի կողքին պայքար մղել հանուն արդարության եւ ճշմարտության: «Դա մեր պարտքն է Հայաստանի եւ հայ ժողովրդի, ինչպես նաեւ այն փրկվածների եւ փախստականների հանդեպ, որոնց Ֆրանսիան գրկաբաց ընդունեց եւ որոնց ժառանգները կերտեցին մեր երկրի պատմությունը:
Համատեղ ճակատագիր կերտելու հնարավորություն ունենալու համար պետք է կարողանալ շիտակ նայել անցյալին՝ գլուխ խոնարհելով մեռյալների հիշատակի առջեւ եւ հարգելով ողջերի հիշողությունը: Դա իմ համոզմունք է, եւ գիտեմ, որ այն կիսում է նաեւ Հայաստանը: Մենք ձեր կողքին ենք հիշողության պահին, ձեր կողքին ենք նաեւ հանուն Հայաստանի ապագայի՝ հիմա, երբ կերտվում է նրա պատմության նոր էջը, որը պետք է լինի խաղաղության եւ բարագավաճման էջ»,- ասվում է Ֆրանսիայի նախագահի նամակում:
Էմանուել Մակրոնը հավելել է, որ Ֆրանսիան եւ Հայաստանը ձեռք-ձեռքի տված հպարտ են իրենց բարեկամությամբ եւ վստահ ապագայի հանդեպ: