Հայաստանում ծրագրերի իրականացման արդյունավետության հետ կապված խնդիր կա: Մայիսի 15-ին «Աշխատիր, Հայաստան» ծրագրի մեկնարկի եւ Աշխատանքի միջազգային կազմակերպության 100-ամյակին նվիրված միջոցառման ժամանակ այս մասին ասաց ՀՀ աշխատանքի եւ սոցիալական հարցերի նախարար Զարուհի Բաթոյանը:
Նա նշեց, որ հարկավոր է աշխատել այդ ուղղությամբ՝ ծրագրերն ավելի հասցեակաան եւ հասանելի դարձնելով:
«Մենք բազմաթիվ ծրագրեր ունենք, որոնք հասանելի են տարբեր խմբերի համար, սակայն զբաղվածության ոլորտում տեղեկացվածության եւ մասնակցության հետ կապված խնդիրներ ունենք», - հավելեց Բաթոյանը:
Նախարարն ընդգծեց, որ այդ ծրագիրը ապահովում է ինտեգրում, ինչը թույլ կտա լավագույն արդյունքների հասնել բոլոր ռեսուրսների ներգրավման ժամանկ: «Երեկ ստորագրված Արժանի աշխատանք ծրագիրը նույնպես իր ավանդը կունենա «Աշխատիր, Հայաստան» ծրագրի իրականացման գործում:
Անհրաժեշտ է նաեւ աշխատանք կատարել օրենսդրության բարեփոխման ուղղությամբ: Կարեւոր է, որ բոլոր գործընթացները հիմնված լինեն մարդու իրավունքների սկզբունքների վրա: Այս ծրագիրը բոլորի համար ստեղծելու է պայմաններ արժանապատիվ աշխատանք գտնելու եւ արժանապատիվ կյանք ապահովելու համար:
Կառավարությունն այս հարցում թափանցիկ քաղաքականություն է վարելու՝ հույս ունենալով, որ այս օրինակին հետեւելու են ինչպես գործատուները, այնպես էլ հասարակական կազմակերպությունները», - եզրափակեց Զարուհի Բաթոյանը: