Իրանում Հայաստանի դեսպանատան մշակութային կցորդ Էդվարդ Խաչատրյանը հայտարարել է Թեհրանում Հայաստանի մշակույթի շաբաթվա անցկացման մասին` երկկողմ հարաբերությունների ամրապնդման համար, հաղորդում է ԻՌՆԱ-ն:
Էդվարդ Խաչատրյանը ԻՌՆԱ-ին տված բացառիկ հարցազրույցում ասել է, որ երկու կողմերը պայմանավորվել են Իրանում Հայաստանի մշակույթի շաբաթվա անցկացման մասին:
Իրանում Հայաստանի դեսպանատան մշակութային կցորդը իրանա-հայկական «Եվա» ֆիլմն անվանել է երկու երկրների հաջողված մշակութային փոխգործակցություններից մեկը: Նա նաեւ նշել է Հայաստանում այնպիսի մշակութային միջոցառումների անցկացման մասին, ինչպիսին «Ոսկե ծիրան» կինոփառատոնն է, որը Հայաստանում անցկացվում է 2004 թվականից:
Իրանցի ռեժիսոր Անահիտ Աբադի առաջին ֆիլմը Իրանի եւ Հայաստանի համատեղ աշխատանքն է:
Ֆիլմը ստեղծվել է Հայաստանում հայ դերասանների մասնակցությամբ: «Եվա»-ն պատմում է 34-ամյա կնոջ կյանքի մասին, որին մեղադրել են ամուսնու սպանության մեջ, եւ նա փախել է՝ դստերը պաշտպանելու համար: 2018 թվականին «Հայկական համայնապատկեր» անվանակարգում լավագույն է ճանաչվել իրանցի ռեժիսոր Անահիտ Աբադի «Եվա» ֆիլմը:
Հայ դիվանագետը նշել է, որ ամռանը Թեհրանի եւ Թավրիզ քաղաքներում հայտնի հայ բանաստեղծ Սայաթ Նովայի անունով համերգ կանցկացվի: