ԱՄՆ-ը պետք է թուլացնի տարածաշրջանի լարվածությունը, Իրանի դեմ ամերիկյան անօրինական պատժամիջոցների չեղարկումը կփոխի տարածաշրջանի իրավիճակը: Այս մասին Թեհրանում Ճապոնիայի վարչապետ Սինձո Աբեի հետ հանդիպման ժամանակ հայտարարել է Իրանի նախագահ Հասան Ռոհանին, հաղորդում է Tasnim-ը:
Նրա խոսքով՝ լարվածության թուլացման համար ԱՄՆ-ը պետք է վերջ դնի անօրինական տնտեսական սահմանափակող միջոցներին:
«Խնդրի լուծման բանալին գտնվում է Վաշինգտոնի ձեռքում, եւ, անկասկած, երբ ամերիկացիները չեղարկեն պատժամիջոցները, իրավիճակն այլ կլինի: ԱՄՆ կառավարության միջոցներն Իրանի դեմ նվաստացնում են Իրանին: Հուսով եմ՝ ամերիկացիները կհասկանան, որ կառավարության կամ բանակի հետ պատերազմը կարող է հաղթանակով ավարտվել, սակայն ժողովրդի դեմ պատերազմը պարտության է մատնված»,- նշել է նա:
Իր հերթին, Աբեն հայտարարել է, որ Ճապոնիան «լուրջ բանակցություններ» է անցկացրել ԱՄՆ-ի հետ՝ Իրանից նավթի ներմուծման հարցով՝ նշելով, որ Տոկիոն ձգտում է զարգացնել Թեհրանի հետ հարաբերությունները տարբեր ոլորտներում: Նրա խոսքով՝ Իրան իր այցի գլխավոր նպատակը լարվածությունը թուլացնել է: