Ազգային ժողովում ընդունվել է հանքերի իրական սեփականատերերի բացահայտմանը վերաբերող օրենսդրական փաթեթը, որը պատրաստվել էր նախորդ կառավարության օրոք եւ առաջին ընթերցմամբ ընդուվել էր դեռ Ազգային ժողովի նախորդ գումարման ընթացքում։ Այս մասին հայտարարություն է տրածել Հայկական բնապահպանական ճակատ քաղաքացիական նախաձեռնությունը:
Հայտարարությունում նաեւ ասվում է.
«Մինչեւ նոր Ազգային ժողով ներկայացնելը՝ ՀՀ նոր կառավարությունն այն քննարկել եւ ընդունել է 2019 թվականի փետրվարի 21-ի նիստում։ Ստորեւ ներկայացված տեսանյութի սկզբում կտեսնեք այդ քննարկման կարեւոր հատվածները․
Հատկանշանական է, որ փաթեթի ներկայացման ժամանակ ոչ մեկը վարչապետին չի ասում, որ օրենքների այս փոփոխությունների մեջ խոսքն իրականում վերաբերում է միայն 10 տոկոս եւ ավել բաժնեմաս ունեցող սեփականատերերին, այլ ոչ թե բոլորին։ Այնպես, որ հանքարդյունաբերող ընկերություններում 10 տոկոսից պակաս բաժնեմաս ունեցող սեփականատերերը կշարունակեն մնալ անհայտ։ Ավելին, երբ վարչապետը կասկածանքով երկու-երեք անգամ դիմում է զեկուցողին եւ փոխվարչապետ Տիգրան Ավինյանին՝ հարցնելով, թե արդյո՞ք ամբողջական տեղեկություները բացահայտվելու են եւ մինչեւ վերջին ֆիզիկական անձը պարզ է լինելու ով է՝ նրանք պատասխանում են, որ այո։
Շատ զարմանալի է, որ այս նիստում վստահ հավաստիացումներ տվող Տիգրան Ավինյանը հետագայում «Սիվիլնեթ» կայքում հունիսի 7-ին հրապարակված հարցազրույցում արդեն նշում է, որ ինքն այդ օրենքների բոլոր դետալներին չի տիրապետում, բայց կարծում է, որ հնարավոր է ինչ-ինչ ընթացակարգերով այդ խնդիրը լուծել։ Նա նաեւ լրագրողին խորհուրդ է տալիս նախաձեռնությամբ հանդես գալ եւ առաջարկություն անել վերանայել, եթե սխալ է արվել։
Ինչպես ասում են՝ մեկնաբանություններն ավելորդ են։ Եվ քանի-քանի նմանատիպ օրենքներ եւ որոշումներ են անցկացրել հետհեղափոխական Հայաստանում ՀՀԿ-ից մնացած կադրերը մոտավորապես նույն սխեմայով՝ լավ հասկանալով, որ Կառավարության նոր անդամներն այնքան էլ լավ չեն տիրապետում իրական տեղեկություններին եւ նրանց կարելի է մանիպուլյացիայի ենթարկել։