«Բարգավաճ Հայաստան» կուսակցության խորհրդարանական խմբակցության պատգամավորները դեմ են քվեարկելու հարկային օրենսգրքի բարեփոխմանը: Հունիսի 25-ին Ազգային ժողովի արտահերթ նիստում, նախքան երկրորդ ընթերցմամբ փաթեթի քվեարկությանն այս մասին հայտնեց ԲՀԿ խմբակցության քարտուղար Արման Աբովյանը:
Նրա խոսքով ԲՀԿ-ում նման որոշում են կայացրել, քանի որ հարկման համակարգի բարեփոխման հարցում ոչ մի փոփոխություն այդպես էլ տեղի չի ունեցել եւ Կառավարությունը դեռեւս մտադիր է բնկաչության բոլոր շերտերի համար եկամտահարկը հավասարեցնել:
Աբովյանն ընդգծեց, որ տվյալ հարցն իրենց համար սկզբունքային նշանակություն ունի:
«Բնակչության բոլոր շերտերի համար հարկերը հավասարեցնելուց հրաժարվելը սոցիալական հավասարության եւ արդարության դրսեւորում կլիներ», - ասաց խորհրդարանական խմբակցության քարտուղարը:
Նշենք, որ 2020 թ. հունվարի 1-ից Հայաստանը կանցնի նոր հարկային համակարգի. անկախ աշխատավարձի չափից՝ եկամտահարկը կկազմի 23 տոկոս:
Ընդ որում մինչեւ 2023 թվականը տոկոսադրույքն աստիճանաբար կնվազի մինչեւ 20 տոկոս:
Զուգահեռ Կառավարությունը նախատեսում է աստիճանական վերադարձ կուտակային կենսաթոշակային համակարգի նախկին պայմաններին, երբ քաղաքացիներից ոչ թե 2.5, այլ 5 տոկոս կփոխանցվի: