Սակրամենտոյում հուլիսի 10-ին տեղի են ունեցել Կալիֆոռնիայում Հայաստանի առեւտրային ներկայացուցչության վերականգնման օրինագծի առաջին լսումները, տեղեկացնում է Asbarez-ը։
Ավելի վաղ Կալիֆոռնիայի նահանգի Սենատը միաձայն հավանություն էր տվել SB 302 օրինագծին, որով վերականգնվում է առեւտրային համաձայնագիրը Կալիֆոռնիայի եւ Հայաստանի միջեւ։ Օրինագիծը ներկայացվել է սենատոր Էնթոն Պորտանտինոյի կողմից։
«Ես անհամբերությամբ սպասում եմ երկրում առեւտրային ներկայացուցչության բացման հնարավորությանը։ Կալիֆոռնիան տնտեսական առաջատար է, իսկ հայ համայնքը՝ մեր հաջողության կենսականորեն կարեւոր տարր»,- նշել է Պորտանտինոն։
Լոս Անջելեսում Հայաստանի գլխավոր հյուպատոս Արմեն Բայբուրդյանը Սակրամենտո է մեկնել, որպեսզի մասնակցի օրինագծի լսումներին։
«Ես շատ գոհ եմ առեւտրային ներկայացուցչության աշխատանքի արդյունքներից եւ անհամբերությամբ սպասում եմ, որպեսզի ավանդս ներդնեմ գալիք աշխատանքում։ Հայ համայնքը եւ ես երախտապարտ ենք սենատոր Պորտանտինոյին նրա նախաձեռնության համար»,- ասաց Բայբուրդյանը։