Թրամփի վարչակազմը ցանկանում է Իրանի հետ համաձայնագրի հասնել, որը կստանա ԱՄՆ Սենատի հավանությունը: Այս մասին Al Jazeera-ի հետ հարցազրույցում ասել է Իրանի հարցով ԱՄՆ հատուկ ներկայացուցիչ Բրայան Հուկը:
«Մենք ցանկանում ենք, որպեսզի համաձայնագիրը, որը պատրաստվում ենք Սենատ ներկայացնել, ստանա ոչ միայն նախագահի, այլեւ Միացյալ Նահանգների աջակցությունը,- ասել է Հուկը: - Դա գործարք կլինի, որն ավելին է, քան ուղղակի քաղաքական պարտավորությունը»:
Թրամփի վարչակազմի կարծիքով՝ 2015 թվականի իրանական միջուկային գործարքի գլխավոր թերություններից մեկն այն է, որ պաշտոնապես չի վավերացվել ԱՄՆ Սենատի կողմից: Վաշինգտոնը համաձայնագրից դուրս է եկել անցյալ տարվա մայիսին:
Չտարածման հարցերով փորձագետները հայտարարում են, որ ԱՄՆ նախագահ Դոնալդ Թրամփը պետք է նախ Իրանին բանակցությունների սեղանի շուրջ նստեցնի, ինչի հավանականությունն այս պահին չափազանց քիչ է՝ հաշվի առնելով, որ Թեհրանը բազմիցս հայտարարել է, որ ԱՄՆ-ի հետ բանակցություններ չի վարի, քանի դեռ պատժամիջոցները գործում են:
«Եթե Թրամփի վարչակազմը չվերադառնա Իրանի հետ համաձայնագրին, ես նոր համաձայնագրի համար ոչ մի հնարավորություն չեմ տեսնում»,- կարծում է Plowshares հիմնադրամի քաղաքականության հարցերով տնօրեն Թոմ Քոլինան:
Նրա խոսքով՝ նախկին նախագահ Բարաք Օբաման, որը բանակցել է իրանական գործարքի շուրջ, որպես պայմանագիր գործարքի վավերացման համար Սենատում անհրաժեշտ ձայներ չստացավ հանրապետականների դիմակայության պատճառով, չնայած փորձագիտական կարծիքին, որ դա լավ գործարք էր: