Այսօրվա մեր էներգետիկ դիվերսիֆիկացիայի մակարդակն այնպիսին է, որ ցանկացած սցենարի դեպքում, կարծում եմ՝ մեր ոլորտի պատասխանատուները լուծումներ կգտնեն: Այս մասին, այսօր՝ հուլիսի 21-ին, ԱԺ-ում լրագրողների հետ զրույցում նշեց ՀՀ փոխվարչապետ Մհեր Գրիգորյանը՝ անդրադառնալով երկու օր առաջ Հայաստանի էներգետիկ համակարգում տեղի ունեցած վթարին:
Խոսելով վթարի պատճառների մասին, նա ասաց. «Երկրների էներգետիկ համակարգերն անջատված չեն, իրենք փոխմիացած են տարածաշրջանում այլ երկրների հետ եւ երբ որ երկրներից մեկում տեղի է ունենում տեխնիկական տատանում, բնականաբար, դա որոշակի ազդեցություն է ունենում կողքի երկրի համակարգի վրա:
Կա նախնական վարկած, որ տեխնիկական տատանում է եղել հարեւան երկրում, որն ազդել է մեր երկրի համակարգի տեխնիկական վիճակի վրա: Բայց ես վերջնական պատասխան հիմա չեմ կարող տալ»:
Հարցին, թե արդյոք դա նշանակում է, որ եթե ԱՄՆ-Իրան հարաբերությունները էլ ավելի լարվեն եւ կոնկրետ գործողություններ լինեն Իրանի դեմ, դա կարող է հանգեցնել մեր էներգետիկ համակարգի համար լուրջ խնդիրների, Մհեր Գրիգորյանն ասաց. «Տեխնիկական ռիսկեր միշտ կան, որոնք որեւէ կապ չունեն մեր հարաբերությունների հետ կամ ընդհանուր աշխարհաքաղաքական իրավիճակի հետ: Ամեն դեպքում կան մեխանիզմներ, որոնք այդ ռիսկերը զսպում են: Ես կարծում եմ, որ վերջին իրադարձությունն էլ ցույց տվեց, որ մեր էներգետիկ համակարգը բավական տեխնիկապես բավարար հագեցած է, որ որոշակի տեխնիկական շոկեր չեզոքացնի»: