Կլիմայի փոփոխությունը սպառնում է Սեւանա լճին: «Տնտեսությունում կլիմայի» ներդրմանը եւ կայուն զարգացման նպատակների իրականացման համատեքստում էներգետիկ արդյունավետությանը նվիրված համաժողովին ելույթ ունենալով այս մասին հայտարարել է փոխվարչապետ Տիգրան Ավինյանը, հաղորդում է «ՌԻԱ Նովոստին»:
Միջոցառումն անցկացվել է Կայուն զարգացման հարցով բարձր մակարդակի քաղաքական համաժողովի շրջանակում:
Ավինյանի խոսքով՝ կլիմայի փոփոխությունը արմատապես ազդում է Հայաստանի լանդշաֆտի վրա:
«Կլիմայի փոփոխությունից ամենից շատ տուժած հատվածը Սեւանա լիճն է: Ջերմաստիճանի բարձրացումը ստեղծել է իրավիճակ, երբ մեզ մոտ առաջացել է լճի կորստի հեռանկար», - ասել էԱվինյանը:
Փոխվարչապետը նշել է, որ տվյալ պահին Հայաստանի իշխանություններն աշխատում են այդ խնդրի լուծման ուղիների որոնման ուղղությամբ: «Առաջին հերթին մենք փորձում ենք բարձրացնել լճի մակարդակը` մոտ 6 մետրով, ինչը նշանակում է, որ մեզ ավելի շատ ջուր է հարկավոր լճում», - ասաց նա:
Դրա շնորհիվ, ըստ նրա, սառը ջրի մակարդակը կլինի ավելի ցածր, ինչը թույլ կտա պահպանել Սեւանը որպես լիճ առնվազն մոտ ապագայում:
«Մենք զգում ենք ջերմաստիճանի փոփոխությունը, դա զգում է նաեւ ֆլորան եւ ֆաունան», - հավելել է նա:
«Կարծում եմ, Հայաստանի իշխանությունները երկար ժամանակ չէին մտածում կլիմայի փոփոխության մասին մինչեւ որ այն չհարվածեց երկրի հենց սրտին: Այժմ մենք հասկանում ենք, որ դրանք շատ լուրջ հարցեր են: Բնապահպանական խնդիրները, ցավոք, անդառնալի ազդեցություն ունեն: Դրա համար մենք հիմա մեծ ուշադրություն ենք դարձնում այդ հարցերին», - ասել է Ավինյանը: